Jubbaland oo sheegtay in ay la wareegeen deegaanno ay gacan ku hayeen Al-shabaab
Arbaco, June,20, 2018 (HOL)- Ciidamada dowladda
Soomaaliya iyo maamul gobolleedka Jubbaland oo maalmihii ugu danbeeyayba
howlgalo ka waday deegaannada ay maamulaan Al-shabaaab ayaa sheegay in ay la
wareegeen gacan ku heynta deegaanka Buulo Xaaji.
Magaalada Kismaayo shalay waxaa ka dhacay shirka
Golaha Amniga Jubbaland, kaasi oo daba socday shirkii Golaha Amniga Qaranka,
waxaana diirada lagu saaray ammaanka deegaanada Jubbaland.
Madaxweyne ku-xigeenka Jubbaland Maxamuud Sayid
Aadan oo warbaahinta la hadlay shirka kadib soona hadal qaaday hawlgalada socda
ayaa sheegay hawlgalkan in AMISOM ay qeyb ka noqon doonto maalmaha soo socda,
wuxuuna tilmaamay in Jubbaland aysan u dulqaadan doonin ciidamo xeryo iska dega
oo aan ka qeyb qaadan dagaalka.
Taliye ku-xigeenka ciidamada Daraawishta Jubbaland Salmaan
Ahmed Bashiir oo ayaa sheegay in AMISOM aysan qeyb ka aheyn hawlgalka socda.
Wuxuu sheegay AMISOM weli in aysan soo buuxin
kaalintii ay ku lahaayeen hawlgalada socda, wuxuuna tilmaamay in ay rajeynayaan
dagaalka socda in ay qeyb ka noqdaan.
Madaxweynaha Jubbaland Axmed Maxamed Islaam
(Madoobe), ayaa laba maalmood ka hor Saraakiisha ciidamada xoogga dalka iyo kuwa
Jubbaland ee Jubbooyinka ku amray inay qaadaan hawllgalo ka dhan ah Al-shabaab.
C/raxmaan
Diini, Hiiraan Online
[email protected]
