Axad, June, 17, 2018 (HOL) -Ra’iisul Wasaaraha Soomaaliya Xasan Cali Kheyre
iyo wafdi uu hoggaaminayo ayaa maanta u ambabaxay magaalada Oslo ee dalka
Norway, halkaasoo ay uga qeyb galayaan Madasha Oslo Forum oo ah shir sanadle ah
oo ay qabato Wasaaradda Arrimaha Dibadda Norway.
Kulankan ayaa socon doona 19-20 June waxaa lagu casuumay Madax iyo
Mas’uuliyiin ka socda Hey’addo iyo ururo caalami ah, waxaana Madaxda ka qeyb
galaya ka mid ah Xoghayaha Guud ee Qaramada Midoobey Antonio Gutteres.
Arrimaha shirka looga hadlayo ayaa waxaa ka mid ah caqabadaha ka jira dunida
saddexaad, doorka nabad dhisida dalalka ay colaaduhu ka jiraan, arrimaha
dhaqaalaha iyo horumarinta.
Ra’iisul Wasaare Kheyre ayaa markii u horeysay tagaya dalka uu dhalashadiisa
heysto ee Norway oo uu ku noolaa muddo, waxaana la filayaa in Madaxda dalkaas
inuu kulamo la qaato iyo wafuuda shirka ka qeyb galeysa.
C/raxmaan Diini, Hiiraan
Online
[email protected]
