Juxa “ Anniga oo Garoonka diyaaradaha ku sii socda ayaan maqlay in xilka leyga qaaday
Khamiis, Janaayo, 04, 2018 (HOL) – Cabdi Faarax Juxa oo wareegto ka soo
baxday xafiiska ra’iisal wasaaraha looga qaaday xilka Wasiirka Arimaha gudaha
ayaa sheegay in warka ku saabsan xil ka qaadistiisa uu ka maqlay Idaacada oo
kaliya.
Qoraal uu soo dhigay barta uu ku leeyahay Internet-ka ayuu ku sheegay in
isaga oo ku sii socda Garoonka diyaaradaha uu Warbaahinta ka maqlay oo kaliya
xil ka qaadistiisa, waxaana uu sheegay in uu ku sii jeeday magaalada Garoowe si
uu u qabanqaabiyo booqashada madaxweynaha dhawaan uu ku tagi doonno deegaannada
Puntland.
Wasiir Juxa ayaa sheegay in uu soo dhaweynayo Wasiirka cusub ee xilka loo
magacaabay Cabdi Maxamed Sabriye una rajeynayo in Alle xilka u fududeeyo.
Sidoo kale Yuusuf Garaad Cumar Axmed oo laga qaaday xilka Wasiirka arrimaha
dibeda ayaa sheegay in qof ka soo wacay dalka Mareykanka uu uu sheegay in laga
qaaday xilkii Wasiirka arrimaha dibeda.
Wareegto ka soo baxday xafiiska ra’iisal wasaaraha ayaa xil ka qaadis lagu
sameeyay saddex Wasiir oo ka tirsanaa xukuumada kuwaa oo kale, Wasiirkii
arrimaha dibeda, Wasiirkii arrimaha gudaha iyo Wasiirkii Ganacsiga, waxaana la
magacaabay saddex Wasiir oo badeli doona Wasiiradda xilalka laga qaaday.
C/raxmaan Diini, Hiiraan
Online
[email protected]
