Siyaasiga Cabdiraxmaan Cabdishakuur oo maanta laga sugayo maxkamada Racfaanka gobolka Banaadir
Arbaco, Janaayo, 03, 2018 ((HOL) - Maanta
oo Arbaco ah ayaa la filayaa lagu wadaa in Maxkamada Racfaanka gobolka
Banaadir uu hortago Siyaasiga C/raxmaan
C/shakuur Warsame, kadib markii Maxkamadda Racfaanka Qoraal ay horey u soo
saartay ku sheegtay in 03-da January 2018 oo maanta ku beegan Maxkamadda laga
sugayo Siyaasiga.
Qoraalka Maxkamadda ay soo saartay waxaa sidoo kale ku qornaa in ay ku
wargelisay Taliyeyaasha qeybta Booliska ee Gobolka Banaadir iyo Taliyaha
Booliska degmada Wadajir in ay gaarsiiyaan mudada loo qabtay dhageysiga
dacwadiisa, si uu uga soo qeyb galo.
Xafiiska Xeer ilaalinta Guud ee Qaranka ayaa sidoo kale ka qeyb galaya
dhageysiga iyo Dooda Dacwadda, waxaana dhammaan dhinacyada lagu wargeliyay in
ay waqtiga ilaaliyaan.
Guddoomiyaha Maxkamadda Racfaanka Gobolka Banaadir Saalax Sheekh Ibraahim
Dhiblawe oo 26-kii December soo saaray warqad qoraal ayaa wuxuu ku sheegay in
uu dib u furay kiiska Cabdiraxmaan Cabdishakuur oo Maxkamadda looga yeeray 27-kii
December, balse Maxkamadda uusan hor imaan, taasina ay qasabtay in mar kale
waqti loo qabto.
War uu shalay soo saaray Cabdiraxmaan Cabdishakuur ayuu ku sheegayin aysan
jirin cid dacwad sharci ah ku haysata, waxaana uu ku eedeeyay Xeer Ilaaliyaha
Qaranka in uu ku soo oogayo dacwad siyaasadeysan.
C/raxmaan
Diini, Hiiraan Online
[email protected]