Sheekh Cali Wajiis : Safaarad ciidan sameysan karta ma jirto, waa in ciidamadu hoos yimaadaan dowladda
Talaado, Janaayo, 02, 2018 (HOL) – Iyadoo maalmihii ugu
danbeeyayba ay soo baxayeen warar sheegaya in ay jiraan ciidamo aan ka amar
qaadan dowladda Soomaaliya oo howlgalo ka fuliya magaalada Muqdisho ayaa waxaa
arintaa ka hadlay qaar ka mid ah culima’udiinka Soomaaliyeed.
Sheekh Bashiir Axmed Salaad iyo Sheekh Cali Wajiis oo ka
mid ah hay’adda Culimada Soomaaliya ayaa
wada jir uga horyimid jirintaan ka ciidamo aan ka amar qaadan dowladda oo ka
howlgala gudaha dalka Soomaaliya gaar ahaan magaalada Muqdisho.
‘’Waaa xaaraan in ciidan aan aheyn kuwa dowladda hub ku
dhax heystaan magaalada Muqdisho, safaarad ciidan u gaar ah sameysan karta ma
jirto, arintaa waxaa ay dhaawaceysaa Qarannimada Soomaaliyeed, ciidanka la leeyahay Imaraadka ayeey la
shaqeeyaan waa in deg deg loogu wareejiyaa dowladda Soomaaliya ayuu yiri’’
Sheekh Cali Wajiis.
Sheekh Bashiir Axmed Salaad dhinaciisa sheegay in
culimada Soomaaliyeed meel cad iska taageen sida uu hadalka u dhigay xaalada
siyaasadeed dalka, isaga oo sheegay in dowladda federaalka looga baahan yahay
in ay maamusho ciidamada kala duwan ee ku sugan dalka.
Hadalka Culimadda Soomaaliyeed ayaa imaanaya ka dib
markii ay soo baxeen warar sheegaya in ciidamadii weeraray guriga senator Cabdi
Xasan Cawaale qeybdiid oo ka tirsan golaha aqalka sare ay ahaayeen ciidamada ay
tababareen dowladda imaaraadka carabta ee Muqdisho ku sugan.
C/raxmaan Diini, Hiiraan Online
[email protected]
