Jimco, Janaayo, 19, 2018 (HOL) – Dowladda Soomaaliya ayaa
sheegtay in ilaa 32 Carruur ah ay ka soo badbaadiyeen Al-shabaab kaddib weerar
ay ku qaadeen Iskuul ku yaala gobolka Shabeellaha dhexe.
Wasiirka wasaaradda warfaafinta dowladda Soomaaliya Cabdiraxmaan
Cumar Cismaan Yariisoow ayaa carruurtan Amnigooda ay sugeyso dowladda
Soomaaliya, isaga oo wax laga xumaado ku tilmaamay in Al-shabaab Carruurta ay u
adeegsanayaan fikirkooda sida uu hadalka u dhigay ‘’Argagixiso’’
Al-shabaab ayaa dhinacooda sheegay in ciidamo Mareykan ah xasuuqeen
carruur kuwo kalana ay qafaasheen kaddib markii ay weerar ku qaadeen dugsi ay
wax ka baranayeen.
Dadka deegaanka ayaa warbaahinta u sheegay in weerarkaas ay
ku dhinteen 10 ruux oo Afar Carruur ahaayeen.
Warbixin ay dhawaan soo saartay hay’adda Xuquuqda Aadanaha
ayaa lagu eedeeyay Al-shabaab in ay qasab ku Askareeyaan Carruur da’doodu aad u
yartay, gaar ahaan deegaanno hoostaga gobolka Bay oo la sheegay in ay tiro
badan oo Carruur ah ka soo kaxeysteen.
C/raxmaan Diini, Hiiraan Online
[email protected]
