Howlgal lagu dilay dagaalyahanno ka tirsan Al-shabaab oo laga fuliyay Jubbada Hoose
Khamiis, Janaayo, 18, 2018 (HOL) - Wararka
ka imanaya gobolka Jubbada hoose ayaa sheegaya in howlgal wada jir ah oo iska
kaashanayeen ciidamada Kumaandooska Soomaaliya iyo ciidamo Mareykan ah laga
fuliyay deegaan lagu magacaabo Baar Sanguuni oo Kismaayo u jira 45km.
Wararku waxaa ay sheegayaan in howlgalkaa ay ka qeybqaateen diyaaradaha
qumaatiga u kaca ee Helicopter ah, iyagoo duqeeyay fariisimo Al-Shabaab ku
leeyihiin deegaanka Baar Sanguuni.
Taliyaha Ciidamada xoogga dalka ee qeybta 43aad Jen. Ismaaciil saxardiid
ayaa u sheegay Idaacada ku hadasha afka Ciidamada xoogga dalka in duqeynta iyo
weerarka ay khasaare ku gaarsiiyeen Al-Shabaab.
Waxaa uu sheegay in Weerarkaasi lagu
dilay illaa 7 dagaalyahan iyo afar sarkaal oo ka tirsan Al-Shabaab, iyagoo
gacanta ku dhigay labo ka mid ah gaadiidka dagaalka.
Ma ahan markii u horeysay oo weeraro wadajir uga fuliyaan Jubadda Hoose ciidamada
Kumaandooska Soomaaliya ee loo yaqaano Danab iyo Ciidamo Mareykan ah.
C/raxmaan Diini,
Hiiraan Online
[email protected]
