Sheekh Bashiir Axmed Salaad oo faah faahin ka bixiyay shir culima’udiin Soomaaliyeed uga socda Kismaayo
Khamiis, Janaayo, 18, 2018 (HOL) – Magaalada Kismaayo waxaa
ku shirsan culima’udiin Soomaaliyeed oo maalmihii ugu danbeeyayba halkaa shir
ku lahaa, waxaana jiray fasiraado kala duwan oo bulshada Soomaaliyeed shirkaa
ka bixinayeen.
Hadaba Sheekh Bashiir Axmed Salaad oo madaxa ka ah hay’adda
culimada Soomaaliyeed ayaa beeniyay in shirkaasi yahay mid siyaasadeed, isaga
oo sheegay in culima’da Kismaayo isugu tagtay ka wada hadalayaan oo kaliya
arrimo wac-yi –galin ah, nabadeynta iyo in dadka laga baarujiyo Qabyaalada.
Sidoo kale wuxuu sheegay Sheekh Bashiir Axmed Salaad
shirkan inuusan aheyn midkii koowaad, balse ay jirtay in la soo qabtay marar
badan, laguna soo qabtay gudaha dalka iyo dibadiisa.
‘’Isku imaatinkan culima’da ma’aha kii ugu horeeyay, dalka
gudihiisa ayaa marar badan lagu qabtay dibadiisa ayaa lagu qabtaa, mid siyaasi
ah ma’aha, waa kulamo umadda lagula hadlo laguna wac-yi-galiyo ayuu yiri Sheekh
Bashiir Axmed Salaad.
Guddoomiyaha Hay’adda Culimada Soomaaliyeed Sheekh
Bashiir Axmed Salaad ayaa VOA-da u sheegay in shirkan looga hadleynin arrimo siyaasadeed,
balse diirada lagu saarayo keliya wacyi gelinta bulshada.
C/raxmaan
Diini, Hiiraan Online
[email protected]
