Qaramada Midoobey oo sheegtay in 4,000 oo Qoysas barakacayaal ah laga bur buriyay xeryihii ay ku noolaayeen
Arbaco, Janaayo, 17, 2018 (HOL)- Qaramada Midoobay iyo dallada ay ku
mideysan yihiin ururada aan dowliga ahayn ayaa sheegay in qoysas gaaraya 4,000
ama 20,000 oo ruux in guryihii ay ku noolaayeen laga burburiyay bishii hore
duleedka magaalada Muqdisho.
Dowlada Soomaaliya ayaa ka jawaabtay eedeymo hore loogu soo jeediyay iyadoo
ballanqaaday inay baaritaan ku sameyn doonto warar sheegaya in kumanaan qoys oo
ka soo barakacay abaaro iyo dagaalo si qasab ah loogaga saaray xeryo ay ku
noolaayeen.
Burburinta lagu sameeyay xeryo qaxooti oo gaaraya labaatameeyo ayaa ahaa mid
aan hore loo sii shaacin sida ay daabacday wakaalada wararka ee Reuters,iyadoo
loo diiday qoysaskii ku noolaa inay agabkii guryaha u yiil ay qaataan.
Qaar kamid ah shaqaalaha hay’adaha gargaarka ayaa laga soo xigtey in ay
arkeen askar labisan dareeska ciidamada dowlada oo ku lug lahaa howsha bur burinta xeryahan.
Wasiirka qorsheynta iyo maalgelinta dowlada federalka Jamaal Xasan ayaa ka
sheegay kulan ay ka qeybgaleen Qaramada Midoobay in dowlada Soomaaliya ay
baareyso wararka sheegaya in qoysas si qasab ah xeryihii ay ku noolaayeen
loogaga saaray.
“Waxaan baaritaan ku sameeynaynaa sida dhabta ah ee ay wax u dhaceen,kadibna
warbixinta aan ka sameyno ayaad ku arki doontaan waxa dhacay iyo sida ay u
dhaceen.”ayuu yiri wasiirka qorsheynta dowlada federalka.
Xafiiska Qaramada Midoobay u qaabilsan isku dubaridka gargaarka (OCHA) ayaa
mar kale cambaareeyay burburinta waxana uu sheegay in dadka si qasab ah guryahoodii
loogaga saaray iyo horumarka Soomaaliya ay ku talaabsanayso aysan ahayn mid
isku dhiganta.
“Guryo kaliya dadkaasi lagama burburin balse dhismayaasha adeegyada
aasaasiga ah oo ay hay’adaha gargaarku bixiyeen sida musqulo,xarumo
waxbarasho,xarumo bulshadu ku kulanto ayaa la burburiyay”ayuu yiri Peter De
Clercq Madaxa OCHA ee dalka Soomaaliya.
“Waxaan ku celinayaa cambaareynteydii arrintan xadgudubka ah waxaana aan ugu
baaqayaa dowlada iyo maamul goboleedyada in ay qaadaan talaabada ku habboon ee
lagu ilaalin karo isl amarkaana lagu gargaari karo dadka sida weyn ay
dhibaatadu u soo gaartay.”ayuu sii raaciyay Peter De Clercq.
Qaramada Midoobay ayaa waxa ay sheegtay in abaaro iyo dagaalo ay ku qasbeen
dad gaaraya 2 malyan oo ruux inay ku barakacaan gudaha dalka Soomaaliya
kuwaasoo badankood degey xeryo aan rasmi ahayn oo ku yaal magaalooyin badan oo
ka mid ah dalka Soomaaliya.
C/raxmaan Diini,
Hiiraan Online
[email protected]
