Talaado, Janaayo, 16, 2018 (HOL) - Xoogag ka tirsan Ururka Al-shabaab ayaa
fiidnimadii xalay waxa ay weerar saf balaaran ah ku qaadeen fariisin ciidamada
dowladda ay ku leeyihiin xaafada Buula-fooliyo oo ka tirsan degmada Afgooye ee gobolka
Shabeellaha Hoose.
Labada dhinac ayaa dagaalka isku adeegsaday hubka nuucyadiisa kala duwan, kadib markii ciidamada
dowladda oo helay gurmad ayaa u suuragashay in ay iska caabiyaan xoogaggii soo
weeraray.
Inkastoo ilaa hadda aan si dhab ah loo ogeyn khasaaraha dhabta ah ee ka
dhashay dagaalkan, ayaa hadana wararka soo baxaya waxa ay sheegayaan in laba
Askari oo ka tirsan Ciidanka Dowladda lagu dhaawacay dagaalkan.
Al-shabaab ayaa dhowr jeer oo hore waxa ay weerareen fariisinkan ciidamada ay
ku leeyihiin xaafada Buula-Fooliyo, intaasi kadib waxaa la geeyay ciidamo ka
tirsan kuwa Midowga Afrika ee AMISOM, balse dhawaan ayeey ka soo ruqaansadeen,
taasi oo Al-shabaab u sahashay in ay mar kale weeraraan.
Sidoo kale ciidamada dowladda iyo Al-shabaab ayaa ku dagaalamay deegaanka
Tixsiile ee dulleedka degmada, kaddib markii ay weerareen dagaalamayaal ka
tirsan Al-shabaab.
Dadka deegaanka ayaa sheegay in ay arkeen meydadka
dhowr qof oo yaallay goobta uu dagaalka ka dhacay, kuwaasi oo isugu jiray
labada dhinac ee dagaalka uu dhexmaray.
Cabsi xoogan ayaa soo wajahday shacabka ku nool degmada Afgooye gaar ahaan
dhalinta, kaddib markii 24 saac ee la soo dhaafay degmadaasi lagu dilay Saddex qof
oo laba ka mid ah ay ahaayeen dhalinyarada degmada halka midka kalena uu ahaa
Askari.
Dhammaan dilalkaas waxaa masuuliyadooda sheegtay Shabaab, labada
dhalinyarada ah ayaa waxa ay ku eedeeyeen in ay ka tirsanaayeen ciidamada
Nabad-sugida dowladda Federaalka.
C/raxmaan Diini,
Hiiraan Online
[email protected]