Qalab Casri ah oo badda Gunteeda ka soo saara burburka Maraakiibta oo lagu wareejiyay dowladda Soomaaliya
Isniin, Janaayo, 01, 2017 (HOL) - Ra’iisal wasaare
ku-xigeenka Xukuumadda Federaalka Soomaaliya Mudane Mahdi Maxamed Guuleed ayaa
maanta kala wareegay qalab casri ah oo ka soo saaraya badda gunteeda Maraakiibta
ku burburta Biyaha Badda iyo qashinka ku dhex jira shirkadda Albeyrak ee dalka
Turkiga.
Qalabkan cusub oo ay keentay shirkadda Albeyrak ee
ka howlgasha Dekadda Muqdisho ayaa waxaa goob joog ka ahaa goobta lagu
wareejinayay dowlada Soomaaliya Wasiirka Dekadaha iyo Gaadiidka Badda Marwo
Maryan Aweys Jaamac,mareeyaha Dekadda ee shirkadda Albeyrak Sami Erol,Wasiirka
Kalluumeysiga iyo Kheyraadka Badda.
Ra’iisal wasaare ku-xigeenka dalka Mahdi Maxamed
Guuleed ayaa sheegay iney ku faraxsan yihiin in maanta ay la soo wareegaan
qalabka caro saarka iyo qashin saarka Dekadda Muqdisho,taasoo suurta gal ka
dhiganeysa in Maraakiib fara badan oo xamuulkooda culus yahay ay ku soo xirtaan
Dekadda.
Wasiirka Dekadaha iyo Gaadiidka Badda Maryan Aweys
Jaamac,ayaa tilmaantay in hadda ay gacanta ku hayaan nidaamkii lagu maamuli
lahaa maaliyadda iyo qaabkii loo jiheyn lahaa Maraakiibta Dekadda ku soo
xirata.
Qalabkaan ayaa ah mid muhiim ah gaar ah uleh Dekadda
Muqdisho,taasi oo Maraakiibta Xamuulka ah ay ku soo xiran karaan,islamarkaana
dakhli xoogan ka soo xaroon doonaan sida ay mas’uuliyiinta Dowladda sheegeen.
Ugu danbeyn, waxaa halkaasi ka hadlay Mareeyaha
Dekadda ee Shirkadda Albeyrak Sami Erol ayaa sheegay iney bilaabi doonaan
nidaamka caro saarka ee Dekadda.
Qalabkaan casriga ah ee maanta la daah furay ayaa
loo diyaariyay shaqaalo loo tababaray bixinta Maraakiibtii ku bur burtay dhowr
iyo labaatan sano ka hor biyaha Badda Soomaaliya.
C/raxmaan Diini,
Hiiraan Online
[email protected]