Wasiirka warfaafinta Somaliland oo 24 suxufi oo warbaahinta ka hadlay Anshax marin ku sameeyey
Arbaco, Feberaayo 28,2018 (HOL)-
Wasiirka Warfaafinta Somaliland Cabdiraxmaan Guri barwaaqo ayaa 24 wariye
shaqaddii ka joojiyey muddo saddex bilood ah ka dib markii warbaahinta ka
hadleen oo ay cabasho ay ka qabeen masuuliyiinta wasaarada ka hadleen.
24 wariye ayaa dhaliilay qaabka
xilal ay ka hayeen wasaaradda looga qaaday, waxaanay sheegeen in qaabka xilka
looga qaaday aanu sharcigu waafaqsanayn,isla markaana koox gaar ahi wasiirka
majaro habaabiyeen.
Masuuliyiintan xilka laga qaaday
ayaa kala ahaa Agaasimihii wararka ee Telefishanka Qaranka, agaasimihii
barnaamijyadda ee Telifishanka, agaasimihii shaqaalaha iyo wariyeyaal la dareen
qabay oo iyaguna warbaahinta ka sheegay dhaliilo dul hoganaya wasaaradda
warfaafinta.
Wasiirka Warfaafinta Cabdiraxmaan
Guri Barwaaqo ayaa sheegay in go’aankan gaadhay ka dib markii ay jabiyeen
sharciga shaqaalaha oo aan ogolayn inay warbaahinta ka sheegaan cabashadoodda
iyo in ay diideen in qof qof ula kulmaan wasiirka si loo ogaaday waxay ka
cabanayaan, taasina ay keentay in muddo sadex bilood ah aanay shaqadda iman oo
wax mushahar ahna aanay qaadan.
Maalmihii u dambeeyey ayaa
khilaaf xoogani ka jiray wasaaradda warfaafinta ka dib markii isku shaandheyn
lagu sameeyey waaxihii wasaaradda.
Barkhad-ladiif M. Cumar,
Hiiraan Online
[email protected]
Hargeysa, Somaliland.