Xukuumadda Somaliland oo joojisay xaflad maanta ka dhici lahayd hoteel ku yaalla magaaladda Hargeysa
Talaado, Feberaayo 27,2018 (HOL)- Xukuumadda Somaliland ayaa
maanta joojisay munaasibad ay xilalka kula kala wareegayeen gudoomiyihii hore ee wargeysyadda
dawladda ee Dawan iyo gudoomiyaha cusub, taasi oo ka dhici lahayd hoteel ku
yaalla magaaladda Hargeysa.
Munaasibadan ka dhacaysay
hoteelka ayaa gabi ahaanba la joojiyey, iyadoo lagu amray masuuliyiintii
hawshadatay in wasaaradda warfaafinta lagu qabto xafladoodda.
Amarkan ayaa hore uga soo baxay madaxtooyadda,
iyadoo lagu amray in hay’adaha dawladdu
munaasibado ku qabsan Karin hoteelada gaarka loo leeyahay ee hay’ad waliba
xarunteeda ku qabsato, haseyeeshee gudoomiyihii xilka wareejinayey Sayid Mire ayaa sheegay in uu isagu jeebkiisa
ka bixinayey kharashka ku baxaya xil wareejinta oo aanay ku bixinayn kharasha
dawladda, isagoo amarkaasi munaasibada lagu joojinayey u arka mid khalad ah.
Gudoomiyihii hore wargeysyada
Dawan Maxamed Cismaan Mire Sayid oo munaasibadaasi laga joojiyey ka hadlaya
waxa uu yidhi “Waxaa baaqatay xil wareejintii aniga iyo gudoomiyaha cusub ee
wargeysyada Dawan loo soo magacaabay ay baaqatay, oo la joojiyay, saaka ayay
wasiiradu igu wargaliyeen in uu jiro amar ka soo baxay madaxweynaha Qaranka
Somaliland laguna sheegayo in xafladaha xil wareejinta ah ee hay’addaha
xukuumada lagu qaban karin Huteelada gaarka loo leeyahay, ee lagu qabto kaliya
xarumaha dawlada”
Gudoomiye Sayid Mire ayaa intaasi ku daray “Arrintaasi aniga laf ahaanteydu
waan ogaa hase ahaate aniga iyo wasiirkayaguba waxaanu u heysanay in
go’aankaasi yahay mid looga dan leeyahay, in lagu yareeyo dhaqaalaha ku baxa
xafladaha ee lagu qabto Huteelada, markaa maadaama xafladayadu ay gaar aheyd oo
aanu anagu iska bixineynay kharashaadka oo aan wax dhaqaale ahin xukuumadda
talada dalka heysa kaga baxeyn, waxaanu is laheyn waa ay ka duwan tahay
xafladaha la joojiyay, maadaama sababta loo joojiyay ay tahay dhinaca
dhaqaalaha, qaban-qaabadii xafladayadana masuuliyiinta wasaaradayada oo dhami
waa ay isla ogeyd, waananu ka wada tashaney, waananu ka wada hadalay qodobkaa
laf ahaantiisa oo aanay aheyn munaasibad xukuumadda dhaqaale kaga baxayo, taasi
ayaa markii horena leygu fasaxay inaan xaflada halkan ku qabto”
Gudoomiyihii xilka wareejinayey
ayaa sheegay in maalinta khamiista uu xilka ku wareejin doono xarunta
wasaaradda warfaafinta.
Xukuumadan cusub ayaa sheegtay in
wasaaradaha dawladda ay ka mamnuuceen inay xaflado ku qabsadaan hoteeladda
iyadoo taasina lagu tilmaamay mid lagu yaraynayo kharashaadka dhaqaale ee ku
baxa iyo mid lagu habaynayo nidaamka dawladda.
Barkhad-ladiif M. Cumar,
Hiiraan Online
[email protected]
Hargeysa, Somaliland.