Ra’iisal Wasaare Kheyre iyo wafdi uu horkacayo oo goor dhaw u anbabaxay Imaaraadka Carabta
Isniin, Feberaayo, 26, 2018 (HOL) - Ra’iisul Wasaaraha Soomaaliya Xasan Cali
Kheyre iyo wafdi uu hoggaaminayo ayaa galabta ka dhoofay garoonka diyaaradaha
Aadan cadde ee magaalada Muqdisho, iyagoo ku sii jeeda dalka isu tagga
Imaaraadka Carabta.
Ra’iisul Wasaare Kheyre ayaa martiqaad rasmi ah ka helay Madaxda Imaaraadka
Carabta, waxaana bil ka hor magaalada Davos ee dalka Switzerland isku arkeen
Wasiirka Arrimaha Dibadda Imaaraadka Carabta.
Ra’iisul Wasaare Kheyre ayaa la kulmi doona Madaxda Imaaraadka Carabta,
isagoo kala hadli doona xoojinta xiriirka labada dal, waxaana dhowaan
Madaxweyne Farmaajo, La Taliyihiisa Amniga iyo wasiiro ka tirsan Xukuumadda ay
la kulmeen Safiirka Imaaraadka Carabta u jooga Soomaaliya.
Dalka Imaaraadka Carabta ayaa ka mid ah wadamada daneeya arrimaha
Soomaaliya,waxaana dowladda Soomaaliya ay dadaal xoogan ugu jirataa xoojinta
xiriirka dhinaca diblomaasiyadda ee kala dhexeeya wadamada Caalamka.
C/raxmaan Diini,
Hiiraan Online
[email protected]
