Khadra X GAYDH“ Xilka madaxweynaha ii magaacaabay waan ka cudur daartay arrimo ii gaar ah awgeed”
Axad,Feberaayo 25,2018 (HOL)-
Guddoomiye ku xigeenkii Hay’adda Dhawrista Tayadda Somaliland Khadra Xaaji
Gaydh ayaa sheegtay inay iska casishay xilkaasi loo magacaabay.
Khadra Xaaji Gaydh oo maanta
xilkii agaasimaha Madaxtooyadda ku wareejisay agaasimaha cusub ee madaxtooyadda
Maxamed Cali Bille ayaa munaasibada ka sheegtay in xilkii kale ee madaxweynuhu
u magacaabay ka cudur daaratay inay qabato.
“Xilka madaxweynuhu ii magacaabay
waan ka cudur daartay arrimo ii gaar ah awgeed, waana u sheegay madaxweynaha in
aanan xilkaasi qabanayn”ayey tidhi Marwo Khadra Xaaji Gaydh.
Mar la waydiiyey sababta xilkaasi
u diiday inay qabato ayaa sheegay inay jeceshahay inay siyaasada kor uga socoto
ee aanay hoos ugu socon, sidaas darteed aanay doonayn inay ku xigeen ka noqoto
hay’adda Dhawrista Tayadda Somaliland.
“Xilkaasi waan isku garan waayey
waxaan ahay gabadh siyaasada soo gashay 15 sanno ka hor wakhtiyadii xisbiyadda
la furey, waxaana jecelahay in aan siyaasada kor uga socdo ee aanan hoos uga
socon, hanka igu jira halkan aan joogay kumaan qanacsanayn meel ka saraysa
mooyee, wax dhibaato ah oo na dhex
taalla ma jirto madaxweynaha aniga uun baa isku garan waayey xilkaasi”ayey
tidhi Khadra Xaaji Gaydh.
Khadra Xaaji Gaydh ayaa ah
haweenay xilal kala duwan ka soo qabatay Somaliland, waxaanay siyaasada ka soo
gashay golaha deegaanka ee degmadda Gabiley oo ay xildhibaan noqotay, ka dibna
ku xigeenka maayarka Gabiley noqotay, markii dambana maayarka Gabiley ayey u
dalacday, waxaana markii dambe madaxweyne Siilaanyo u magacaabay agaasimaha
madaxtooyadda, iyadoo khamiistii dhowaa loo
bedelay inay ku xigeen ka noqoto hay’ada Tayada oo ay hada iska casilay ka dib
markay u aragtay in xilkaasi aanay u qalmin.
Barkhad-ladiif M. Cumar,
Hiiraan Online
[email protected]
Hargeysa, Somaliland.