Golaha Ammaanka oo si buuxda isugu raacay xabad joojin 30 cisho ka dhaqan gasha Suuriya
Axad, Feberaayo, 25, 2018 (HOL) – Golaha Ammaanka ee Qaramada Midoobey ayaa si
buuxda isugu raacay qaraar lagu dalbanayo xabad joojin socon doonta muddo 30
cisho ah oo ka dhaqan gasha Suuriya, xilli dagaalada iyo duqeymaha ka socda
dalkaas ay sii xoogeysteen todobaadyadii u dambeeyay.
15-ka xubnood ee Golaha ammaanka ayaa u codeeyay
qaraarkan, kaasoo ogolaanaya in la gaarsiiyo gargaarka bani’aadanimo iyo mid
caafimaad goobaha colaada ka jirto.
Cod u qaadida qaraarkan ayaa dhowr jeer oo hore
dib u dhacay illaa khamiistii, iyadoo xubnaha Golaha Ammaanka ay ku
guuldareysteen inay wax heshiis ah ka gaaraan.
Ruushka oo xulufo la ah Suuriya ayaa doonayay
inuu is bedel yimaado, hase ahaatee Diblomaasiyiinta reer Galbeedka ayaa
Ruushka ku eedeeyay inuu waqtiga luminayo.
Xoghayaha Guud ee Qaramada Midoobey Antonio
Guterres ayaa sheegay in xaalada ka jirta bariga Ghouta inay la mid tahay sida
Dhul Naar oo kale.
Safiirka Mareykanka u fadhisa Qaramada Midoobey
ayaa ku baaqday in sida ugu dhaqsiyaha badan loo fuliyo xabad joojinta.
Arrintan ayaa imaaneysa muddo todobaad oo bariga
Ghouta oo ay gacanta ku hayaan mucaaradka ay ku socdeen duqeymo xad-dhaaf ah oo
dowladda Suuriya ku heysay.
C/raxmaan Diini, Hiiraan Online
[email protected]
