Khilaaf ka dhashay xil ka qaadis lagu sameeyay Maareeyaha Telefishanka Qaranka Somaliland
Sabti, Feberaayo, 24, 2018
(HOL) - Maareeyihii hore ee Telefishanka Qaranka
Somaliland Khadar Maxamed Cukule ayaa sheegay in aanu wasiirka Warfaafinta xil
ka qaadi Karin maadaama oo wareegto madaxweyne xilka loogu dhiibay.
Arrintan ayaa ka dambaysay ka dib markii wasiirka Warfaafinta
Somaliland C/raxmaan Guri Barwaaqo uu xilka ka qaaday maareeyihii Telefishanka
Qaranka,isla markaana uu ka dhigay agaasime waaxeed hoostaga wasaaradda
warfaafinta, halka markii hore ka ahaa in Telefishanka Qaranku ka madax banaan
yahay wasaaradda warfaafinta.
“Anigoo maareeyaha Telefishanka ayaa la isku soo daray liis uu
wasiirku isku shaandheyn ku sameeyey taas oo layaab igu noqotay, dadka waxa
kala haga waa sharci, aniga madaxweynihii hore ee Somaliland ayaa xilkan isoo
magacaabay, illaa iyo hadana ma jirto wareegto ka soo baxay madaxweyne Muuse
Biixi iga soo gaadhay oo xilka la igaga qaaday iyo in Telefishankii qaranka
laga dhigay waax ka tirsan wasaaradda warfaafinta”ayuu yidhi maareeyihii
Telefishanka qaranka Khadar Cakule.
Khadar Cakule ayaa sheegay iin aanu wasiirku awood u lahayn inuu xilka
ka qaado,isla markaana sheegay in uu wasiirku ku talaabsaday sharci jabin
maadaama oo labadooduba wareegto madaxweyne xilka ku joogaan.
Dhinaca kale, wasiirka warfaafinta iyo dhaqanka Cabdiraxmaan Guri
barwaaqo, ayaa ka jawaabay eedda loo soo jeediyey, waxaanu sheegay in
madaxweyne Muuse Biixi uu sameeyey xeer nidaamiye tilmaamaya hay’adaha la isku
daray iyo kuwo kala madaxa banaan, waxaanu xusay in Telefishanka wasaaradda la
hoos keennay wasaaradiisa.
“horta madaxweynaha magacaabay madaxweynihii hore ee maamulkiisa tagay
weeyi, dawladiina way la tagtay waxa la sameeyey xeer nidaamiye cusub waxaana
ku cad in Telefishanka qaranku hoos yimaado wasaaradda Warfaafinta, xeerkaasi
ayaa sheegay inuu maareeyihii hore meesha ka baxayo, waxaanu telefsihanku
noqday waax ka tirsan wasaaradda”ayuu yidhi Guri barwaaqo.
Si kastaba ha ahaatee, intii xukuumadan cusub timid waxa la isku
dardaray hay’ado kala madax banaan halka wasaaradana loo bedelay hay’ado madax
banaan, taas oo loo sameeyey xeer nidaamiya hay’ad kasta oo dawladda ah
shaqadeedda iyo awoodeedda tilmaamaysa.
Barkhad-ladiif M. Cumar, Hiiraan Online
[email protected]
Hargeysa, Somaliland.