Xaalad Abaareed iyo caafimaad oo aad u daran oo ka taagan degmooyinka Xuddun iyo Taleex
Sabti,
Feberaayo, 24, 2018 (HOL) - Gudoomiyaha Xisbiga KULMIYE ee gobolka Sool
Axmed Maxamed Daadey ayaa sheegay in dhibaato adag ay ka taagan tahay degaano
badan oo ka mid ah degmooyinka Xuddun iyo Taleex.
Daadey oo safar ku tegey degaanadaas qaar ka mid ah ayaa HOL
uga waramay xaalad adag oo u baahan in si degdeg ah wax looga qabto, iyadoo uu
sheegay in dhibaatada ugu badan ay tahay hada biyo la'aan baahsan.
"Waxaan soo maray degaano ay ka mid yihiin Xuddun,
Lafweyne, Laasacurdan, Holol iyo degaano kaleba, waxaana odhan karaa xaalada
haatan dadka degaanadaas degani ay tahay mid aad u adag, ceelashii lagu baxsan
jirey ee ay ka mid ahaayeen ka Awrboogays iyo Lafweyne labaduba waa xumaadeen
dad iyo duunyoba waxay la yihiin waxay cabaan" ayuu yidhi Axmed Daadey.
Sidoo kale waxaa degaanadaasi laga soo sheegayaa xanuuno aad
u aafeeyey dadka degaanadaas oo ay ka mid yihiin Jadeeco, Busbus iyo xanuuno
kale oo dadka degaanadaas dhibaato ku haya sida uu Dr, Axmed Cali oo ku sugan
Xuddun HOL u sheegay.
"Heerka ay marayso jadeecada waxaan ka soo qaadan karaa
sadex wallaalo ah oo dhowaan ku dhintay maalin iyo habeen magaalada
Awr-boogays, runtiina aafada uu xanuunkaasi ku hayo degaanka lama tira koobi
karo oo dadku way aasayaan wixii ka dhinta laakiin xogaysi badan aan samaynay
aad buu u badan yahay.
Si kastaba ha ahaatee waxaa bilaabmay xaalad kale oo adag
iyadoo sanadihii la soo dhaafay ay dad iyo duunyoba saameeyeen abaaro
isdabajoog ah hawgu sii daraado sanadkii u danbeeyey oo ay caydhoobeen kumanaan
qoys oo hada duleedka magaalooyinka degan.
Seynab Cabdi Warsame
[email protected]
Laascaanood G. Sool