Guddoomiyaha Gobolka Banaadir oo Isbitaalada ku booqday dhaawacyada qaraxyadii Muqdisho
Sabti, Feberaayo, 24, 2018 (HOL) – Guddoomiyaha Gobolka Banaadir ahna Duqa
Muqdisho C/raxmaan Cumar Cusmaan Yariisoow ayaa xalay saqdii dhexe booqday
Isbitaalada la dhigay dadkii ku dhaawacmay qaraxyadii shalay ka dhacay
magaalada Muqdisho.
Qaraxyada oo ahaa kuwo is xigay oo ka kala dhacay labo goobood ayaa waxaa
dadka ugu badan ee dhimashada iyo dhaawaca ka soo gaaray ay ahaayeen dad rayid
ah.
Guddoomiyaha oo kormeeray qeybaha kala duwan ee isbitaalka oo la dhigay
dadka qaba dhaawacyada, ayaa caafimaad u rajeeyey dadka ay dhibaatadu soo
gaartay, isagoo tilmaamay in qaraxyadani ay calaamad u yihiin cadowtinimada
baahsan ee ay kooxaha nabad-diidka u hayaan shacabka Soomaaliyeed, waxaana
tacsi tiiraanyo leh u diray ehelada dadkii falkaas ku geeriyooday.
“Waxaan isbitaalka ku booqanay dhaawacyada ka dhashay qaraxyadii caawa
dhacay, waxaana u mahadcelinayaa dhakhaatiirta ku howllaneyd qalliinka iyo
daweynta. Hay’adaha Amniga iyo kuwa gurmadkana door weyn ayey ka qaateen
badbaadada shacabka”.Ayuu yiri guddoomiye Yarisow oo intaas raaciyey in qaraxa
ka dhacay isgoyska baar FIAT ku soo beegmay xili ay dhalinyaro badan ka
yimaadeen xeebta Liido maadaama ay Jimco aheyd.
Guddoomiyaha Gobolka Banaadir ayaa waxaa booqashada uu ku tagey Isbitaallada
ku weheliyey Wasiirka Amniga Xukuumadda Soomaaliya, Taliyaha Ciidanka Booliska
Soomaaliyeed iyo masuuliyiin ka tirsan maamulka gobolka Benaadir.
Ku dhawaan 30 ruux ayaa ku geeriyootay qaraxyadii shalay gilgilay magaalada
Muqdisho, kaasoo mas’uuliyadiisa ay sheegatay Kooxda Al-Shabaab.
C/raxmaan Diini, Hiiraan Online
[email protected]