Axad, April, 08, 2018 (HOL)-Waxaa muuqanaya in hadda baadi goob loogu jiro sidii loo qaboojin lahaa xiisad siyaasadeed todobaadyadii ugu danbeeyayba ka dhax aloosneyd xildhibaannada Golaha Shacabka kaddib guddiyo shalay loo saaray xal u helida khilaafka.
Madaxweynaha dowladda Soomaaliya
Maxamed Cabdullaahi Farmaajo ayaa tan iyo xalay kulamo kala duwan waxaa uu la
lahaa guddiyo ay iska soo dhax magacaabeen dhinacyada iska soo horjeeda ee
gobollaha Shacabka, waxaana inta badan kulamadaasi looga wada hadlayay sidii
wada hadal loogu dhameyn lahaa is mari-waaga labada dhinac.
Madaxweynaha dowladda Soomaaliya
ayaa kulan la qaatay guddi ka socday xildhibaannada taabacsan guddoomiyaha
Golaha Shacabka Prof Maxamed Cismaan Jawaari, waxaana uu kala hadlay
madaxweynuhu habka ugu wanaagsan ee khilaafkan loo soo afjari karo.
Xildhibaannada waddahadalka ku
matalayay guddoomiye Jawaari ayaa sheegay in ay soo jeediyeen in dhameynta
xiisadan loo maro habka sharcigu dhigayo oo ah in mooshinka laga galiyo cod
qarsoodi ah, laguna qabto goob lagu wada qanci karo oo ay beesha caalamkuna
goob joog u tahay.
Sidoo kale waxaa jira kulamo kale
oo ka dhacay xarunta Villa Hargeysa oo guddiyadu uga wada hadlayeen in wada jir
loo anbaqaado arimaha ku saabsan mooshinka, iyadoo meel leyska dhigayo
khilaafka iyo kala aragti-duwanaashaha labada dhinac ee iska soo horjeeda.
Xildhibaannada taageersan Prof
Jawaari ayaa ku adkeysanaya haddii laga fursan waayo in cod la galiyo mooshinka
dhinacooda ay doonayaan in codku noqdo mid qorsoodi ah oo aan gacan taag aheyn.
Madaxweynaha ayaa hadda ku howlan
sidii loo mideyn lahaa aragtida xildhibaannada ee la xiriira mooshinka si wada
jir looga gudbo is-mari-waaga jira.
Guddiyada labada dhinac ka kala
socda qaarkood ayaa warbaahinta u sheegay in hadda wax xoogaa hormar ah laga
sameynayo wada hadallada socda.
C/raxmaan Diini,
Hiiraan Online
[email protected]
