Eheladda Sayid Cabdalla Xassan oo Madaxweyne Biixi ku dacwaynaya wasiirka Warfaafinta Somaliland
Sabti, April, 07, 2018 (HOL) – Eheladii
Halgamaagii Sayid Cabdala Xasan ayaa magaaladda Hargeysa u yimid sidii
Madaxweynaha Somaliland ugu gudbin lahaayeen dacwad ka dhan ah wasiirka
Warfaafinta Somaliland Cabdiraxmaan Guri Barwaaqo oo lagu haysto buug uu ka
qoray Sayidka taas oo ay ku tilmaamay inuu ahaa mid gafaf waaweyn laga gallay.
Eheladda Qoyska Sayidka ayaa ka kala yimid
London iyo Kenya, waxaanay sheegeen in wufuud kale ka ka kala imanayaan
Jig-jiga iyo meelo kale, kuwaas oo si weyn uga cabanaya buugaasi Sayidka wax
lagaga sheegayey.
Fardawsa Jaamac Caamir iyo Ibraahim Macalin
Xuseen Sh. Cabdiraxmaan oo sheegay inuu Sayidku adeer u yahay ayaa si
weyn uga dhiidhiyey buugaasi Sooyaal ee uu qoray toddobo sanno ka hor wasiirka
Warfaafinta Somaliland Guri-barwaaqo, waxaanu cinwaan uga dhigay Sayidku ma
wadaad buu ahaa mise…. Waxaanu inta badan ka sheekaynayey khaladaadkii Sayidka
iyo gabayo badan oo uu sheegay in aan la shaacin blse uu wax kaga sheegayo
dumarka Soomaaliyeed.
“Sayidku wuxu ahaa nin soomaaliyeed oo ka soo
jeeda Somaliland, taariikhda Somaliland waxay ka bilaabanta daraawiish iyo
Sayid Cabdala Xasan, madaxweyne Muuse Biixi oo olihiisa si fiican buu uga
hadlay daraawiish iyo Sayidka, laakiin waxaan ka xunahay inuu xukuumadiisa ku
jiro shakhsi Bugaasi xun ka qoray inuu ku jiro, waxay ahayd in taariikhdii
Sayidka lagu ururiyo Somaliland oo meel kasta oo taalo looga tagay Somaliland
ayaa ka mudan oo ay tahay in laga taago, anagu kooxdii u horeysay ee
arintaasi u timid baanu nahay meel walbana waa laga soo socda oo jig jiga madax
dhaqameed iyo culimaba way ka soo socdaan Hargeysa la iskugu imanayaa”ayey
tidhi Fardawsa Caamir oo ka soo jeeda qoyska Sayid-ka.
Fardawsa Caamir ayaa sheegtay in Buugan la
ururiyo oo la gubo,isla markaana aanay dadku akhrisan, maadaama oo gafaf badan
ku jiraan.
“Buugan waxa ku jira Gabayo laga been abuurtay,
waxaanu leenahay madaxweyne Muse BIIXI cadaalad baan u baahnahay, anagu umaanu
iman in aanu shacabka ku kicino laakiin waa in aad noo tudhaa oo
shacabkaagii baanu nahay, waxaana doonayna in aanu la kulano madaxweynaha”ayuu
yidhi Ibraahim Macalin.
Buugaan Sooyaal ee uu qoray Wasiir Guri Barwaqo
ayaa buuq badan ka dhaliyey Somaliland,isla markaana wali dacwadiisu taagan
tahay, waxaana hore dhowaaq dheer ka muujiyey gabayo dumarka taabanaya oo ku
jira Buugaasi, taas oo kicisay beelo dhan oo Somaliland degan, taas oo
dumarkoodii wax lagaga sheegay.
Barkhad-ladiif M. Cumar, Hiiraan Online
[email protected]
Hargeysa, Somaliland.
