Khamiis, April, 19, 2018 (HOL)–Xisbiga mucaaradka ah ee WADDANI ayaa madaxweyne Muuse Biixi ugu baaqay inuu is casilo ama xil ka xayuubin lagu saneeyo kaddib markii heshiishkii Dekadda Berbera Imaaaradku sheegay in ay la saxiideen dowladdii hore ee Soomaaliya.
Gudoomiyaha xisbiga WADANI C/raxmaan Cirro ayaa
sheegay in warka ka soo baxay wasiirudawlaha arrimaha Dibadda Imaaraadka ee uu
siiyey idaacada BBC-da qaybteeda Carabiga ay tilmaamayso in heshiishkaasi uu
saxeexay mdaxweynihii hore ee Soomaaliya, taasina ay ka hor imanayso hadaladii
madaxweynihii hore ee Siilaanyo iyo madaxweyne Muuse Biixi shacabka u
sheegayeen oo uu ku tilmaamay kuwo beenoobay.
Gudoomiye Cirro oo eedeentii ugu kululeed u
jeediyey xisbiga KULMIYE waxa uu yidhi “Siyaasadu been maaha mala awaal maaha
shacabkaaga oo la hagar daameeyo maaha, danta shacabka oo laga saraysiiyo
danta shakhsiga maaha, waxa cadaatay in xukumadihii kala dambeeyey ee
KULMIYE hasaawe been ah ugu sheekaynayeen shacabkoodda”
“Madaxweynihii hore Axmed SIilaanyo wuxuu
sameeyey khiyaamo qaran oo ku mudan in maxkamada la hor geeyo, Madaxweyne
Muuse wuxuu jabiyey dastuurka wuxuu ku kacay khiyaamo qaran waxa u banaan laba
mid kood inuu yeelo inuu is casilo, dadkana saamaxad waydiisto, kuna dhowaaqo
in la qabto doorashooyinka madaxweyne oo cusub, waa kale oo u banaan hadii uu
taas yeeli waayo in lagu qado khiyaamo qaran oo lagu sameeyo maamuus ka
xayuubin”ayuu yidhi Cirro.
Gudoomiyuhu waxa kale oo uu tilmaamay inay jirto
in dadkii la iska xidh xidhayo oo xoriyatul qawlkii meesha ka baxay, waxaanu
yidhi “Kulmiye wuxu irida u xidhay xuquuqul insaankii xoriyadi hadalka,
jeelasha way buuxaan mid hadlay iyo mid baraha bulshada wax ku qoray mid
wargeys wax ku qoray mid riyooday mid aan wali loo sheegin wixi lagu magay
intuba liintay jeelka ku dhex cabayaan”
Xisbiga WADANI ayaa sheegay in hadalka ka soo
yeeray wasiirudawlaha arrimaha dibadda ee Imaaraadka Carabta Anwar Qarqaash uu
yahay mid khashifay wararkii beenta ahaa ee heshiishka lagula gallay Imaaraadka
.
Anwar Qarqaash ayaa sheegay in heshiishka dekadda
Berbera ay saxeexeen xukuumadii hore ee Soomaaliya, isla markaana aanay xafiis
ku lahayn Somaliland wax xidhiidh ahna aanay la lalahayn Somaliland.
Barkhad-ladiif M. Cumar, Hiiraan Online
[email protected]
Hargeysa, Somaliland.
