Sheekh Bashiir : Waan ka digeynaa Bandhig Fanneedka la qabanqaabinayo in lagu qabto Muqdisho
Arbaco, April, 18, 2018 (HOL)- Hey’adda Culimada Soomaaliyeed ayaa digniin
ka soo saaray bandhig faneedyo lagu wado in 20-ka bishan lagu qabto magaalada
Muqdisho, iyaga oo ugu baaqay dowladda in la joojiyo.
Sheekh Bashiir Axmed Salaad oo ah guddoomiyaha hey’adda Culimada Soomaaliyeed oo ka hadlayay
shir jaraa’id oo ay ku qabteen magaalada Muqdisho ayaa ugu baaqay dhalinyarada
in aysan lacagtooda ku bixin sida uu hadalka u dhigay Carrada Alle, islamarkaana ka qeybgalin Bandhig Fannneedka la
qaban-qaabinayo.
Waxaa uu ku eedeeyay xubno ka tirsan dowladdaa in ay
fannnaaniintan ku soo dhaweeyeen Muqdisho, islamarkaana qeyb ka yihiin
qaban-qaabada showgga ama Bandhig Fanneedka.
“Waxaan u soo jeedineynaa shacabka,
gaar ahaan dhalinyarada in aanay ka qeyb gelin bandhig fanneedkaas oo aanay
lacagtooda ku bixin Carrada Alle iyo cadaabta” ayuu yiri guddoomiyaha hey’adda
Culimada.
Fannaaniinta lagu wado in ay ka qeybgallaan Bandhiggan ayaa waxaa ka mid ah Kiin
Jaamac oo maalmihii ugu danbeeyay siweyn uga soo dhax muuqatay baraha bulshada
kaddib Show ay ku qabtay magaalada Nairobi ee dalka Kenya.
C/raxmaan Diini, Hiiraan Online
[email protected]
