Arbaco, April, 18, 2018 (HOL) - Sida uu daabacay
Wargeyska Al Akhbar ee ka soo baxa dalka Lebanon dowladda Imaaraadka Carabta
ayaa ka hor timid siyaasadda Sucuudiga ee gudaha iyo dibadda.
Dhaxal sugaha Imaaraadka Mohammed bin Zayed, ayaa
ka shaqeynaya sidii siyaasadda Sucuudiga uu uga bixi lahaa Imaaraadka una jebin
lahaa xiriirka labada dal.
Wargeyska Al Akhbar, waxaa uu xogtan ka helay
Danjiraha Joordan ee Lebonan,kaas oo qoraalkan isaguna ka helay Dowladda
Imaaraadka Carabta.
Danjirayaasha Imaaraadka, Joordan iyo
Lebonan,ayaa kulan ku yeeshay magaalada Beirut ee Caasimadda Lebanon,waxaana ay
halkaas isku dhaafsadeen dukumiintiyo sir ah oo labada dal u dhaxeeya kana dhan
ah Sucuudiga.
Nabil Masarwa, oo ah danijraha Jordan ee Lebanon
ayaa hadalkan laga soo xigtay isaga oo u sheegaya danjiraha Kuwait u
fadhiya Beyruud,ninka lagu magacaabo Abdel-Al al-Qenaie.
Mid ka mid ah Dukumintiyada oo ku taariikheysan
20kii September 2017,waxaa uu muujinayaa kulan dhexmaray labada danjire
ee dowladaha Kuwait iyo Joordan ee Lebanon,waxaana ay ka wada hadleen aragtida
Imaaraadka.
Dukumiintiga labaad ayaa waxaa uu soo baxay
28ka Bishii September 2017, waxaana uu muujinayay kulan dhexmaray
Danjiraha Jordan ee Lebanon iyo danjiraha Imaaraadka ee Lebonan kaas oo
lagu magacaabo Hamad bin Saeed al-Shamsi.
Safiirka Jordan ee Lebonan ayaa laga soo xigtay
isaga oo leh “siyaasadda Sucuudiga kuma qanacsana Imaaraadka weyna diidday”.
Danjiraha Imaaraadka ee Lebonan ayaa laga soo
xigtay isaga oo leh “Siyaasadda Sucuudiga,waxaa ay ka hor imaneysaa danaha
Imaaraadka ee gudaha iyo Dibadda”.
Dooddan waxaa ay dhalatay markii Nin u dhashay
Qadar uu isu taagay Madax Hay’adda UNICEF,waxaana Lebonan ay u codeysan Ninka u
dhashay Dalka Qadar oo lagu magacaabo Hamad bin Abdulaziz al-Kawari, Imaaraadka
ayaana aad uga xumaaday arrintaas.
Ra’isalwasaaraha Lebonan Rafiiq Al Xariiri
ayey Imaaraadka ku eedeeyeen in uu ogaa in dalkiisa uu u codeynayo Ninka u
dhashay dalka Qadar doorashadii dhacday 18kii October 2017.
November ra’isal wasaaraha Lebonan ayaa iska
casilay xilkaas isaga oo joogay Sucuudiga mar dambe ayuusa sheegay in uu
ka laabtay is casilaaddiisa.
C/raxmaan Diini, Hiiraan Online
[email protected]
