Wasiir Cabbaas oo Aas Qaran loogu sameeyay magaalada Muqdisho [Sawirro]
Khamiis, 04, 2017 (HOL) –Waxaa goor dhaw oo maanta ah lagu aasay magaalada
Muqdisho alle ha u naxariisteen wasiirkii howlaha guud iyo dib u dhiska
xukuumada Soomaaliya Cabbaas Sheekh Cabdullaahi Siraaji oo xalay lagu dilay
ilinka hore ee madaxtooyada Soomaaliya.
Waxaa aaska marxuumka ka qeyb-gallay ra’iisul wasaaraha Soomaaliya Xassan
Cali Kheyre, ra’iisal wasaare ku-xigeenka xukuumada Soomaaliya,guddoomiye ku-xigeenka koowaad ee baarlamaanka,, inta badan xubnaha gollaha wasiiradda xildhibaanno, ehelada marxuumka iyo dad kale oo ay asxaab
ahaayeen.
Marxuumka ayaa waxaa salaada Janaasada lagula tukadata masjid ku
yaalla madaxtooyada Soomaaliya, waxaana ka qeybgalay salaada madaxweynaha Soomaaliya Maxamed Cabdullahi Farmaajo iyo madaxda kale ee Qaranka, kadib waxaa loo qaaday qabuure
ku yaalla isbitaal Madiina, halkaasi oo lagu aasay.
Ra’iisul wasaaraha Soomaaliya Xassan Cali Kheyre oo goobta ka hadlay ayaa Alle uga baryay marxuumka in uu jannadii ka waraabiyo qoyskii iyo eheladii uu ka
tagayna uu samir iyo Iimaan ka siiyo, wuxuuna ra’iisul wasaaraha sheegay
in cadaalada la horkeeni doono raggii falkan ka dambeeyay.
Wasiirka ayaa ahaa nin dhalinyaro ah oo dhawaan uun ku soo biiray siyaasada,
waxaana uu ka mid ahaa qaxootiga Soomaaliyeed ee wax ku soo bartay xeryaha
Dhadhaab ee gobolka Waqooyi Bari Kenya.
C/raxmaan Diini, Hiiraan Online
[email protected]
