Taliyaha Booliska Somaliland oo beeniyey warar maalmihii u dambeeyey magaaladda Hargeysa la isla dhexmarayey
Khamiis, Maarso, 30, 2017 (HOL) – Taliyaha ciidanka Booliska Somaliland Gen:Cabdilaahi Fadal
Iimaan ayaa been ku tilmaamay hilib maalmo ka hor la qabtay oo dadka qaar u
qaateen inuu yahay hilib bani’aadan.
Sidoo
kale, waxa uu ka hadlay dad la sheegay in la sixrayo ee muddooyinkan dambe
dadweynaha cabsi galiyey, waxaanu sheegay in kiisaas ay u qabteen 23 dhacdo,
balse afar ka mid ah uun yeesheen Raad raac inta kale ay been tahay.
“Waxa
jira dad sheegaya in la qabtay talaagad ay ku jiraan xubno ka mid ah jidhka
bani’aadamka, taas oo aan sal iyo raad toona lahayn, qofka war aan jirin oo
been ah faafiya waxa lagu qaadi doona qodob nabadgalyadd ah, marka qofku warka
uu sheegayo waa inuu iska hubiyaa.”ayuu yidhi Fadal.
Mar
uu ka hadlayey arrimaha dadka la sixraayo waxa uu sheegay in wararkaasi u badan
yihiin been abuur, isla markaana dad waxyeello kale ka cabanaya u dhigayaan in
la sixrayo, waxaanu hadalkiisa ku bilaabay “Illaa hadda waxa na soo gaadhay 23
dhacdo oo arintaasi sicirka la xidhiidha, afar ka mid ah ayaa yeeshay
raad raac, laba waxa u xidhan shan qof, laba baadhistooda gacanta lagu hayaa,
boolisku markii ay baadhis qoto dheer ku sameeyeen afarta dhacdo ee raadka leh,
mid wuxu noqday isku day kufsi, mid waxay ahayd gabadh yar oo si khiyaamo ah
lagu kaxeeyey waxaana u xidhan afar qof, halka laba kale oo kiis oo ah laba
hablood oo laga soo kaxaystay Burco baadhisteedu wali socoto, sagaal iyo
tobanka ka kale ee kiis dhamaantood waxay noqdeen been abuur, waxa iyagana u
xidhan afar qof oo ka mid ah dadkii been abuurkaasi sameeyey, intii baadhistu
socotay waxaanu ogaanay arrimahan: waxa meesha ku jirta tahriib xeeladaysan, oo
boolisku is dul taagay, dadkii fulinayey mid ka mid ahna ay gacanta ku hayaan,
iyo hablo ka cararayey rag la siinayey ama la siiyeyba”
Maalmihii
u dambeeyey waxa magaaladda Hargeysa iyo baraha bulshada la isla dhexmarayey
warar ku saabsan inay jiraan kooxaha ka ganacsadda dadka oo xubnaha jidhka iyo
dad dadka sixraya oo kaxaysanaya.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
