Guddida doorashooyinka shaaciyey tiradda guud ee isku diwaangalisay doorashadda Somaliland
Talaado, Maarso, 28, 2017 (HOL)- Guddida doorashooyinka
Somaliland ayaa maanta ku dhawaaqay wakhtiga, tirada guud ee iska diwaangalisay
wadanka iyo gobol waliba inta ka diwaangashan.
Sidoo kale, waxa uu guddida
doorashooyinku soo saaray wakhtiga la qaybinayo Kaadhadhka doorashooyinka lagu
galayo oo ay saddex qaybood u qaybiyeen.
“Guddida doorashooyinku wuxuu
maanta si rasmi ah ugu dhawaaqayaa in uu soo bandhigi doono jadwal qeexan oo
faahfaahinaya hawsha kaadh-qaybinta codbixiyayaasha ee .Kaadh-qaybintu waxay
yeelanaysa saddex weji oo kala dambeeya, iyada oo wejigii walba laba Gobol ay
mar ka wada bilaaban doonto Kaadh-qaybintu.”ayaa lagu yidho war-saxaafadeed ka
soo baxay.
WEJIGA KOOWAAD ee hawsha Kadh-qaybintu waxay mar ka wada
bilaabanaysa labada Gobol ee kala ah Awdal iyo Saaxil iyo goobaha xeebaha ah ee
Sanaag madaama sadexdaas Gobol ay xeebo leeyihiin, anagoo xeerinayna cimilada
goobaha xeebaha dartood.
WEJIGA LABAAD waxa
kaadhadhka codbiyayaasha loo qaybin doona Gobolada Maroodi-Jeex iyo Togdheer.
WEJIGA SADDEXAAD waxa lagu
dhamaystiri doona Kaadh-qaybinta codbixiyayaasha ee Gobollada Sool iyo Sanaag.
Hadaba, wejiga kowaad ee
Gobollada Awdal iyo Saaxil iyo Goobaha xeebaha ah ee Gobolka Saanaag, waxay
qaybinta kaadhadhka codbixiyaashu ka bilaabmaysa bisha April 29, 2017, iyadoo wejiga labaad
iyo kan sadexaad ay kaadh-qaybintu bilaaban doonto Bisha baraykasan ee Ramadaan
ka bacdi.
Dhinaca kale, waxa guddida
doorashooyinku shaaciyeen tiradda gobolada iska diwaangalisay iyo gobol waliba
inta codad ee ka codeyn karta, waxaanay kala yihiin sidan hoos ku qoran:
Gobolka Awdal waxa iska diwaangaliyey dad lagu qiyaasay: 147,031, gobolka Maroodi jeex waxa iska diwaangaliyey dad lagu qiyaasay 312,634, gobolka Saaxil waxa iska
diwaangaliyey 78,842, gobolka
Togdheer waxa iska diwaangaliyey 178,506,
gobolka Sool waxa iska diwaangaliyey 71,096,
gobolka Sanaag waxa iska
diwaangaliyey dad lagu qiyaasay 85,222,
guud ahaan Somaliland oo dhan wadarta guud ee iska diwaangalisay waxay
noqonaysaa 873,331.
Barkhad-ladiif M. Cumar,
Hiiraan Online
[email protected]
Hargeysa, Somaliland.
