Khamiis, Janaayo, 26, 2017 (HOL) – Guddoomiyaha baarlamaanka
Soomaaliya Prof Max’ed Cimaan Jawaari ayaa ugu baaqay musharixiinta u taagan xilka madaxweynaha Soomaaliya in
ay ilaaliyaan islamarkaana dhowraan shaqada iyo waajibaadka u yaala gudiga
qabanqaabada doorashada.
Gaar ahaan Jawaari ayaa ugu baaqay dhamaan musharixiinta
daneynaya in ay u tartamaan xilka madaxweynaha Jamhuuriyada ilaaliyaan
jadwalka is diiwaangalinta musharixiinta oo ku eg Axada nagu soo
foolka leh.
”Musharaxiinta waxaan u sheegeynaa in ay ilaaliyaan Jadwalka
is diiwaangalinta, Musharaxii uu ka dhaco wakhtiga doorashada mala diiwaangalin
doono waxaa loo baahan yahay in la ilaaliyo xiliga is diiwaangalinta”
Xarunta Villa Hargeysa ayeey ka soctaan isdiiwaangalinta,
waxaana mashquul ah gudiga oo halkaa ku qaabilayay musharixiin kala duwan
kuwaa oo qaarkoona is diiwaangaliyay.
Musharixii ugu horeeyay ee tagay goobta doorashada ayaa
noqday madaxweynihii hore ee dowladdii KMG Shariif Sheekh Axmed oo is diiwaangaliyay.
Guddoomiyaha baarlamaanka ayaa ugu baaqay guddiga doorashada
madaxweynaha in ay shaqeeyaan si hufan ,islamarkaana ay ilaaliyaan laftirkooda
Jadwalka doorashada.
Ugu danbeyntii, doorashada sanadkan oo noqon doonta mid ka
xiiso badan kuwii ka horeeyay ayaa la filayaa in ay ku tartamaan musharixiin
uu ka mid yahay madaxweynaha tallada haya Xassan Sheekh Max’uud, madaxweynihii
hore Shariif Sheekh Axmed, rag horey ra’iisal wasaarayaal uga soo noqday dalka,
iyo siyaasiyiin caan oo qaarkood marar badan oo hore ka soo qeyb-gallay doorashada
iyo kuwa ku cusub siyaasada intaba.
C/raxmaan Diini, Hiiraan Online
[email protected]