Shir looga hadlayay dakhliga iyo dhaqaalaha Soomaaliya oo Muqdisho ka dhacay
Talaado, August, 01, 2017 (HOL) – Ra’iisul wasaare ku xigeenka xukuumada
Soomaaliya Mudane Mahdi Maxamed Guuleed (Khader) ayaa maanta ka qayb galay shir
looga hadlayay dakhliga iyo dhaqaalaha Soomaaliya, kaa soo ay soo qaban
qaabiyeen Bankiga Aduunka.
Shirka ayaa waxaa sidoo kale ka qeybgallay wasiirka Boostada iyo
Isgaarsiinta, Wasiirka Ganacsiga, Agaasimaha guud ee Maaliyada, Shirkadaha
Ganacsiga, Gobolka Banaadir, Jaamacadaha dalka iyo Madax ka socotay Bankiga
dhaxe.
Ra’iisul Wasaare ku xigeenka Soomaliya oo kulan daah furay ayaa ka warbxiyay
dakhliga soo gala dalka iyo isbdelka ku dhacay dhaqaalaha Soomaaliya, waxuuna
caddeeyay in Sanadihii ugu danbeeyay la dareemayay koror dhaqaale, taaasoo uu
ku sababeeyay wada shaaqeyn u dhaxeysa ganacsatada iyo dawladda dhaxe, hasse ahaatee
waxaa uu sheegay in aan wali la gaarin halkii loo baahnaa.
Ra’iisul wasaare ku xigeenka ayaa tilmaamay in Ganacsiga Soomaaliya intiisa
badan uu yahay mid ku tiirsan dalka dibadiisa, waxuuna sheegay in xukuumadu
samaynayso siyaasad ay ku kordhinayso dakhliga iyo dhaqaalaha dalka, iyadoon
aan la kordhin canshuurta, balse shacabka Soomaaliyeed ayuu u soo jeediyay in
ay bixiyaan canshuuraha si dawladu ay u fuliso adeegyada bulshada dalkuna uu
horumar u gaaro.
“Sharciga canshuur bixinta Soomaaliya waa mid gaboobay, waxayna u badan
tahay in dib loo eego si loola jaan qaado caalamka”. Ayuu yiri Ra’iisul Wasaare
ku xigeenka Soomaaliya.
Madaxdii lagu marti qaaday shirka ayaa dhamaantood isku raacay in dhaqaalaha
Soomaaliya uu kordhay sadexdii sano ee ugu dambeeyay, waxayna soo jeediyeen in
la dhiirigaliyo wax soo saarka dalka, sidoo kalena la abuuro fursado Ganacsi.
C/raxmaan
Diini, Hiiraan Online
[email protected]
