Musharax isku soo taagay qabashada xilka madaxweynaha maamulka Hirshabeelle
Axad, September, 03, 2017 (HOL) – Cabdi Faarax Laqanyo oo horay u soo noqday
guddoomiyaha maamulka gobolka Hiiraan ayaa munaasabad maanta ka dhacday
magaalada Muqdisho uga dhawaaqay in uu yahay musharax u taagan qabashada xilka
madaxweynaha maamulka Hirshabeelle.
Odayaal iyo waxgarad munaasabada ka qeybgallay ayaa sheegay
in musharaxa u qalmo qabashada xilkan, iyaga oo ka codsaday bulshada ku dhaqan
labada gobol Hiiraan iyo Shabeellaha dhexe in ay ku taageeraan Cabdi Faarax
qabashada xilka madaxweynaha.
Nabadoon Axmed Cabdulle Jimcaale ayaa ka codsaday musharixiinta kale in ay u tanaasulaan
musharaxa, waxaana uu dhinaca kale baarlamaanka maamulka Hirshabeelle ka
dalbaday in ay codkooda siiyaan Cabdi Faarax Laqanyo.
“Siyaasiyiinta dooneysa in ay qabato xilka madaxweynaha Hirshabelle waxaan
ugu baaqeynaa in ay u tanasulaan Laqanyo maadaama uu yahay ruugcadaa
siyaasadeed’’”ayuu yiri Nabadoon Axmed Cabdulle Jimcaale.
Musharax Cabdi Faarax Laqanyo oo kulankan ka hadlay u mahadceliyay dadkii ka
soo qeybgalay oo sii qabanqaabiyay kulanka lagu taageerayay waxana uu sheegay
in qorshahiisa siyaasadeed uu dhowaan soo bandhigi doono.
“Waxaan u mahad-celinayaa dadka soo qabanqaabiyay kulankan waxaanse
ballanqaadayaa in aan horumar dhinac walba leh gaarsiin doono bulshada
Hirshabeelle oo haatan u baahan samatabixin iyo in dowlad goboleedyada kale ay
la jaanqaadaan.”ayuu yiri musharax Cabdi Faarax Laqanyo.
Dhawaan ayaa la filayaa in la qabto doorashada madaxweynaha
maamulka Hirshabeelle, kaddib markii lagu dhawaaqay guddi ka kooban Sagaal
xubnood oo soo diyaarinaya habka ay u dhaceyso doorashada.
Xildhibaannada maamulka Hirshabeelle ayaa kalsoonida kala
noqday madaxweynihii hore ee maamulka Cali Cabdullaahi Cosoble oo ku sugan
magaalada Beledweyne.
C/raxmaan Diini,
Hiiraan Online
[email protected]
