Axad, September 24, 2017 (HOL) – Guddoomiyaha guddida
doorashooyinka Somaliland Cabdiqaadir Iimaan Warsame ayaa sheegay in qaybo ka
mid ah qalabkii doorashooyinka lagu galayey wadanka soo gaadheen.
Gudidda doorashooyinka ayaa madaarka
Hargeysa kala soo degay qalabkii doorashooyinka qayb ka mid ah waxaanu sheegay
in inta u hadhayna bisha Octobar 13-keedda iman doonaan.
Gudoomiyaha guddida
doorashooyinka qaranka Cabdiqaadir Iimaan Warsame oo ka hadlayey qalabkan waxay tidhi “Waxa
inoo yimid shixnadii ugu horeysay inoo timid waxaanay ka kooban tahay afar kun
oo ilo xidhood, waana waxa lagu qoro waraaqda doorashadda waana markii ugu
horeysay ee aynu isticmaalno waa qalab caalami ah, ilaa 13 ka Octobar ayuu
shayga ugu dambeeya ee doorashadda lagu galayaa imanayaa,”.
Mar uu ka hadlayey dadka
tushuushka galiya in aanay doorasho dhacayn oo ay dib u dhacayso waxa uu yidhi
“ waxaanu ku wargalinaynaa dadweynaha iyo dadkii su’aasha ka qabay doorashaddu
ka dhici doontaa iyo ma dibay u dhici doontaa, doorashaddii waa la galay waana
lagu jiraa, qof kasta sidaas ha aamino, sidaas ayaana ku galaynaa doorashaddii
oo inoo qoondaysan November, 13/2017-ka”,
Doorashaddii madaxweynaha ayaa
waxa ka hadhsan wax ka yar konton cisho, waxaanay sheegeen in tobanka cishe soo
socda usoo dhamaystirmi doonaan qalabkoodda.
Dhinaca kale, guddida
doorashooyinka iyo guddida anshaxa ayaa awoodi kari waayey in xisbiyadda ka
joojiyaan ololaha aanay wakhtigeedii gaadhin ee ay bilaabeen, waxaana inta
badan olole balaadhan oo la iskugu soo baxayo goboladda ka sameeya labadda
xisbi ee WADANI iyo KULMIYE, taas oo sharcigu u ogolayn.
Inkastoo komishanka
doorashooyinku digniino iyo garaaxba ku xukumeen labadaasi xisbi hadana wali
wuu socdaa ololaha aan wali la fasaxin ee labadaasi xisbi samaynayaan.
Barkhad-ladiif M. Cumar, Hiiraan
Online
[email protected]
Hargeysa, Somaliland
