Gollaha wasiirada Galmudug oo ka hadlay khilaafka siyaasadeed ee ka dhax jira maamulka
Axad, September, 24, 2017 (HOL) – Kulan magaalada Cadaado ay ku
yeesheen xubnaha gollaha wasiirada maamul gobolleedka Galmudug ayaa looga wada
hadlay khilaafka siyaasadeed ee soo kala dhaxgalay mas’uuliyiinta maamulka.
Wasiirka Warfaafinta Galmudug Maxamuud Aadan ayaa warbaahinta faah faahin ka
siiyay wax yaabihii ka soo baxay shirka ay ku yeesheen Cadaado.
Waxaa uu sheegay wasiirka in leysku afgartay joojinta dhamaanba shirarka
siyaasadeed inta xal laga gaarayo khilaafka u dhaxeeya Madaxda maamulka.
Waxaa kaloo uu sheegay in leysku raacay in Galmudug loo daayo xalinta
khilaafkeeda, in la ilaaliyo amniga iyo in waqti badan la galiyo u gurmashada
dadka dhibaateysan.
Go’aamadan ka soo baxay golaha wasiirada Galmudug ayaa ka dambeeyay, kaddib
markii Madaxweynaha Galmudug, Madaxweyne kuxigeenka iyo Guddoomiyaha
Baarlamaanka uu soo kala dhex galay khilaaf ka dhashay xiisada khaliijka oo
Maamulka Galmudug uu isku khilaaf.
Dhawaan ayeey aheyd markii qoraal ka soo baxay madaxtooyada Galmudug oo uu
ku saxiixaan madaxweyne Xaaf lagu taageeray isbaheysiga Sacuudiga iyo
Imaaraadka Carabta, halka dhinaca kale go’aankaa ay ka soo horjeesteen
madaxweyne ku-xigeenka iyo guddoonka sare ee baarlamaanka Galmudug.
C/raxmaan Diini, Hiiraan Online
[email protected]