Sabti, September, 23, 2017 (HOL) – Madaxweynaha dowladda Federaalka ah ee
Soomaaliya Maxamed C/llaahi Farmaajo ayaa maanta shir guddoomiyay kulan looga
hadlayay dib u eegista Arrimaha dastuurka dalka, kaasoo lagu wado in dhowaan
loo soo bandhigo dadweynaha.
Kulankan ayaa waxaa goob joog ka ahaa Guddoomiyeyaasha Golaha Shacabka iyo
Aqalka sare ee Baarlamaanka Federaalka Maxamed Sheekh Cusmaan Jawaari, Cabdi
xaashi Cabdullaahi, Ra’iisul Wasaare kuxigeenka Mahdi Maxamed Guuleed, Wasiirka
dastuurka C/raxmaan Xoosh, iyo Guddoomiyeyaasha Guddiyada Dastuurka Qaran iyo
kan madaxa banaan.
Intii uu socday kulanka ayaa waxaa si weyn looga hadlay sidii loo heli lahaa
dastuur dhameystiran oo uu dalka yeesho, ka hor dhamaadka sanadka 2018, si
bulshada Soomaaliyeed ay afti uga dhiibtaan Dastuurka.
Madaxweyne Farmaajo ayaa sheegay in Hey’addaha Dastuurka dalka looga fadhiyo
hab iskaasho, si looga mira dhaliyo howsha dib u eegista Dastuurka, isla
markaana shacabka codkooda wax ku doortaan mustaqbalka dhow.
Sidoo kale Madaxweynaha ayaa ku booriyay Guddiyada ay quseyso arrimaha dib u
eegista Dastuurka dalka inay wada shaqeyn dhow ka yeesheen sidii loo dar dar
gelin lahaa, isla markaana waqti dhow la soo afjaro howsha dib u eegista oo
muhiim au ah doorashooyinka dalka ka dhici doono.
C/raxmaan Diini, Hiiraan Online
[email protected]