Sabti, September, 23, 2017 (HOL) – Wararkii
ugu danbeeyay ee naga soo gaaraya magaalada Gaalkacyo ayaa sheegaya in wali uu
ka soconayo deegaan lagu magacaabo Qurac-Gaashaan dagaal u dhaxeeya
maleeshiyaad ka soo kala jeeda maamulada Puntland iyo Galmudug.
Dagaalkan ayaa qarxay kaddib markii maalmihii ugu danbeeyay deegaaannadaas
ka dhaceen dilal la xiriira Aano Qabiil sida ay warbaahinta u sheegeen dad ku
sugan magaalada Gaalkacyo.
Wararku waxaa ay sheegayaan labada dhinac ee dagaalamaya isku adeegsanayaan
hubka noocyadiisa kala duwan waxaana saameyntiisa laga dareemay magaalada
Gaalkacyo.
Deegaanada lagu dagaalamayo ayaa ah deegaan Oomane ah ayaa waxaa in muddo ah
ka jiray muran la xiriira ceel biyood u dhaxeeya.
Odayaal iyo waxgarad ka soo jeeda labad dhinac ayaa hadda ku howlan
sidii loo joojin lahaa dagaalka oo sababay barakaca dadkii reer miyiga ahaa oo
markii horeba la dhibaateysnaa Abaartii ku dhuftay gobolka.
Ma jirto wax war ah oo ka soo baxay maamulada Galmudug iyo Puntland oo ku
aadan dagaalka maleeshiyo beeleedyada u dhaxeeya.
C/raxmaan Diini, Hiiraan Online
[email protected]