Sabti, September, 23, 2017(HOL) – Faah faahin dheeraad ah ayaa ka soo baxaya
dagaal culus oo maalintii shalay deegaanka Ceelcadde ee gobolka Hiiraan ku
dhaxmaray ciidamada dowladda iyo Al-shabaab.
Guddoomiyaha deegaanka Far Libaax Jamaal Isxaaq Cabdulle oo la hadalay
warbaahinta ayaa sheegay in saakay xaaladu ay dagan tahay, islamarkaana
ciidamada dowladda ay iska caabiyeen dagaalyahannada Al Shabaab, sida uu
hadalka u dhigay.
Hasse ahaatee ilo xog-ogal ah oo ku sugan deegaan ayaa sheegay in Al Shabaab
dagaalkaasi ay ku dileen Seddex ka mid ah Maleeshiyaadka ku sugnaa deegaanka Ceel
Cadde ee Gobolka Hiiraan.
Inta badan deegaanada ay ku sugan yihiin ciidamada dowladda iyo kuwa AMISOM
waxaa ka dhaca weeraro gaadma ah oo ay dagaalyannada Al Shabaab ku soo qaadaan
fariisimada ciidamadaasi ay ku leeyihiin gobolka Hiiraan.
Deegaannadan lagu dagaalamay ayaa marka laga soo tago ciidamada dowladda
waxaa ka howlgala oo ku sugan maleeshiyaad iskood isku abaabulay oo marar badan
oo hore dagaal culus la galay xoogagga Al-shabaab.
C/raxmaan Diini, Hiiraan Online
[email protected]
