Maamulka gobolka Banaadir oo wax ka qabanaya goobaha biyo fariisinka ah ee Muqdisho
Jimco, September, 22, 2017
(HOL) – Iyadoo magaalada Muqdisho saacadihii ugu danbeeyay ka da’ayeen roobab
lagu diirasaday, ayaa dhinaca kale roobabkan waxaa ay sameeyn ku yeesheen isku
socodka dadka iyo gadiidka, kaddib markii jidadka qaar ay gooyeen biyaha
roobka.
Maamulka gobolka Banaadir
ayaa sheegay in uu arintaan ka warqabo islamarkaana bilihii ugu danbeeyayba ku
howlanaayeen sidii ay wax uga qaban lahaayeen goobaha biyo fariisinka ah marka
ay da’aan roobabka.
Guddoomiye ku-xigeenka maamulka iyo Maaliyada
gobolka Banaadir Maluuko Cabdiqaadir
Dheere ayaa warbaahinta u sheegtay in dadaalo badan ay geliyeen
bilooyinkii ugu dambeeyay wadooyinka biyaha ay fariistaan sidii wax looga qaban
lahaa oo deg deg biyaha looga qaadi lahaa.
Sidoo kale waxay sheegtay in qorshaha maamulka gobolka Banaadir uu yahay
sidii loo dayactiri lahaa bulaacadaha waa weyn ee ku yaalla hareeraha
wadooyinka, kuwo cusubna loo dhisi lahaa.
Xalay waxaa magaalada Muqdisho ee caasimadda Soomaaliya iyo nawaaxigeeda ka
da’ay Roob ay ku qabowsadeen shacabka, laakiin gadiidleyda ayaa marka aad la
sheekeysato kuu sheegaya in marka ay sidan oo kale roobabku u da’aan ku adkaato
in ay maraan jidadka qaar magaalada.
C/raxmaan Diini, Hiiraan Online
[email protected]