Jicmo, September, 22, 2017 (HOL) – War
ka soo baxay madaxtooyada Galmudug ayaa lagu eedeeyay mas’uuliyiinta ugu
sareysa dowladda Soomaaliya in ay faragalin ku hayaan maamulka, kaddib khilaaf
ka dhashay go’aan madaxtooyada Galmudug ka qaatay khilaafka wadamada Khaliijka.
Madaxweyne ku-xigeenka maamulka Galmudug iyo guddoonka baarlamaanka
maamulkaas ayaa si wada jir ah uga hor yimid go’aan madaxweyne Axmed Ducaale
Geelle Xaaf uu kula saftay xulufada Sacuudiga iyo Imaaraadka ee ka dhanka ah
Qatar.
Warka ka soo baxay madaxtooyada Galmudug ayaa dhignaa siddan :
Dawlad Goboleedka Galmudug waxay mar
kale ku celinaysa mowqifkeeda ku aadan go’aanka ay ka qaadatay khilaafka
dawladaha Khaliijka u dhaxeeya.
Dastuurka ku meelgaarka ah
qodobkiisa 53 aad wuxuu dhigayaa in
- Iyada oo la qaddarinayo nuxurka iskaashi ee lagu
shaqaynayo, xukuumadda Federaalku waa in ay Dawlad- goboleedyada kala
tashataa wada-xaajoodyada la xiriira kaalmada dibedda, ganacsiga, ama
arrimaha muhiimka ah ee la xiriira heshiisyada caalamiga ah.
- Marka ay wada-xaajoodyadu si gaar ah u saamaynayaan
danaha khuseeya Dawlad- goboleedyada, xukuumadda Federaalku ergada
wada-xaajoodka geleysa waxaa kaabaya wakiillo ka socda Dawladaha xubinta
ka ah Dawladda Federaalka.
- Xukuumadda Federaalka marka ay ka hawlgelayso wada-
xaajoodyada, waa in ay isu aragtaa xilgudashadeedana ka muuqtaa in ay
tahay ilaaliyaha danaha Dawladaha xubinta ka ah Dawladda Federaalka.
Dawlada Federaalka ah kuma salayn
go’aanka ay ka qaadatay khilaafka Khaliijka xiriirka soo jireenka ah iyo danta
joogtada ah ee kala dhaxaysa Dawladaha Sacuudiga, Masar, Imaaraadka Carabta iyo
Baxrayn.
Waxaan ugu baaqaynaa Siyaasiyiinta,
Odyaasha, Waxgaradka, Aqoon yahanka, Ganacsatada, iyo Culimada kasoo jeeda
Galmudug in ay meel uga soo wada jeestaan si wadajir ahna uga hortagaan daandaansiga
iyo dhiilada lagu hayo Shacabka iyo dowladda Goboleedka Galmudug.
C/raxmaan Diini, Hiiraan Online
[email protected]
