Jicmo, September, 22,
2017 (HOL) - Wali waxaa magaalada New York ka soconaya shirarka gooni goonidaa
ee uu Raysulwasaare Hassan Ali Kheyre la yeelanayo madax badan oo ka socota
Beesha Caalamka, kuwaas oo ay siyaabo kala duwan u kulmeen, waxaana kulamadaasi
ay noqonayaan kuwo Madaxda wadamadu isku arkaan.
Raysulwasaare Kheyre waxa uu la kulmay Wasiirka Arimaha
dibada ee China Wang Yi Waxa ay labada Masuul kawada hadleen sidii loo xoojin
lahaa xariirka soo jireenka ah ee labada dal u dhexeeya iyo sidii China ay
maalgashi ugu samaysan lahayd Soomaaliya, iyada oo ka caawinaysa dowlada
Soomaaliya sidii ay dib ugu soo ceshan lahayd muuqalka iyo bilicda dalka,
Labada Masuul iyo wafuudooda ayaa yeeshay shirar albaabadu u xiranyihiin.
Kulan saxaafada loo diiday ayuu Raysulwasaare Kheyre iyo
wafdigiisa la qaateen madax ka socota wadamada ay ciidamadu ka joogaan
Soomaaliya kuwaas oo sida xubnaha dowladu noo xaqiijiyeen ka wada hadlay arimo
la xariira Xoojinta xariirka wadamadaas la leeyihiin Soomaaliya, Horumarinta
howlgalada ka dhanka ah Nabad diidka iyo sidii loo heli lahaa ciidamo
Soomaaliyeed oo la wareega amniga dalkooda.
Madaxdii ay la kulmeen wafuuda dowladda Soomaaliya waxa ay
qireen in Soomaaliya ay ka soo kabanayso xaaladihii adkaa ee ay soo martay isla
markaana uu muuqanayo isbadal dhaxal gal ah, iyaga oo balan qaaday in ay is
garab taagi doonaan dowlada Soomaaliya.
Raysulwasaaraha oo ka hadlay shir ay hogaaminayeen dowladaha
Soomaaliya,UK, Talyaaniga, iyo xoghaya guud ee qaramada midoobay ayaa sheegay
dowladiisu ay muhiim u tahay kaalinta ay beesha caalamku kaga jirto soo celinta
amaanka iyo xasilooni dhab ah oo Soomaaliya ka dhacda, hase ahaatee ay
xukuumadiisu xooga saarayso sidii ay u kobcin lahayd dhaqaalaha, shaqo abuurka
iyo in ay u furantahay Soomaaliya Maalgashi caalami ah.
Shirarkii uu Raysulwasaaruhu ka qeybgalay waxaa ka mid ahaa
shir looga hadlayay Abaaraha iyo ka hortaga misiibooyinka dabiiciga ah, waxa
uuna ka sheegay in Hay'adaha samafalka qaarkood ay sheegaan in aysan ka
howlgalikarin ama tagi karin Soomaaliya qataro dhinaca amaankaa oo jira
awgood, Taas oo uu ku tilmaamay mid ka hor imaanaysa in la samafalo malaayiin
dad ah oo u bahan taageero dhab ah.
Waxaa uu xusay in xaalada Soomaaliya ay dhinacyo badan ka soo
kabanayso gaar ahaana amniga, loona baahanyahay in aan isha laga fiirsan.
Manta oo Jimcaa ayaa lagu wadaa in uu soo jeediyo Qudbadiisa
uu ka jeedinayo shirka Gollaha loo dhanyhay ee Qaramada Midoobay.
Deeqo Shire (SONNA)
[email protected]