Khamiis,, September, 21, 2017 (HOL) - Bashiir Xusseen Dhoore oo horay u soo
noqday guddoomiye ku-xigeenkii maamulka iyo maaaliyada degmada Beledweyne, kana
mid ahaa Aqoonyahannada gobolka Hiiraan ayaa caawa u geeriyooday xanuun deg deg
ah la soo darsay.
Guddoomiyaha degmada Beledweyne Aadan Axmed Xeefoow ayaa
warbaahinta u sheegay in marxuumka uu la soo darsay xanuun deg deg ah xili uu
ku jiray Salaad Maqrib islamarkaana uu Iimaam u ahaa mas’uuliyiin ay ku wada
tukanayeen xarunta maamulka degmada Beledweyne.
‘’xarunta ayaa Saalada Maqrib ku wada Tukaneynay, Isaga ayaa
Iimaam ka ahaa Salaada, Labadii Rakco ee
ugu horeysay markii uu tujiyay ayuu soo kici waayay, Jameecadii Salaada ayeey
iska sii wateen, markii Salaada laga faaruqayna waxaa la arkay isaga oo meyd ah’’
ayuu yiri guddoomiyaha degmada.
Bashiir Xusseen Dhoore marka laga soo tago in uu xilal kala
duwan ka soo qabtay maamulka gobolka, waxaa uu ka soo qeyb qaatay dhismihii
dowladihii ku-meel-gaarka ahaa ee isaga danbeeyay dalka, gaar ahaan dowladdii uu
madaxweynaha ka ahaa CabdiQaasim Salaad Xassan ee lagu soo dhisay dalka
Jabuuti isaga oo ka mid ahaa howladeennadii shirkii Carta.
C/raxmaan Diini, Hiiraan Online
[email protected]