Mas'uuliyiin ka qeybgashay munaasabad loo qabtay Ardey ka qalinjabisay Jaamacada Jobkey
Khamiis, September, 21, 2017 (HOL) Xaflad ballaaran oo shahaadooyin lagu gudoonsiinayey
boqolaal arday oo ka qelin jebisay shanta kuliyadood ee Jaamacadda Jobkey ayaa
lagu qabtay Magaalada Muqdisho.
Munaasabadan
oo si heer sare ah loo soo qaban-qaabiyey ayaa waxaa ka qeyb galay masuuliyiin
ka tirsan goleyaasha xukuumada iyo baarlamanka Somalia, qeybaha kala duwan
bulshada, fanaaniin, waalidiin arday, iyo marti sharaf kale.
Intii
ay munaasabadan socotay ayaa waxaa lagu soo bandhigay suugaan kala duwan oo
isugu jirtay heeso, ciyaaraha hidaha & dhaqanka iyo gabayo ka turjumeyey
qiimaha waxbarashada.
Guddoomiyaha
Jaamacadda Jobkey C/casiis Caagane C/samad oo ka mid ahaa masuuliyiintii ka
hadashay Munaasabadan ayaa sheegay in maanta ay u tahay maalin farxadeed, uuna
u hambalyeynayo ardayda qelin jebisay oo uu sheegay iney yihiin dufcadii 3aad
oo tiradoodu gaareyso 1,057 arday, wuxuuna dhinaca kale ku dheeraaday asaaska
Jaamacada marxaladihii ay soo martay, horumarka ay ku talaabsatay iyo
qorsheyaasha ay higeysaneyso mustaqbalka dhow.
“Maanta
waa maalin xusuus mudan, waxaan naga qelin jebineysa 1,057 arday oo u qeybsan
Muqdisho 892 arday, faraca Jowhar 134 arday iyo faraca B/weyne oo 31 arday ay
ka aflaxeen, waxayna qaadanayaan Shahaadada heerka Koowaad ee Bachelorka
waa guul taariikhi ah oo u soo hoyatay bahda waxbarashada Soomaaliyeed” ayuu
yiri guddoomiye Caagane oo Mustaqbal wanaagsan u rajeeyey ardayda qelin jebisay
oo uu sidoo kale ugu baaqay in ay sii wataan Waxbarashadooda.
Guddoomiyaha
gobolka Banaadir ahna duqa Muqdisho Taabit Cabdi Maxamed oo isna ka hadlay
xafladaas ayaa sheegay in ardayda faraha badan ee ka qelin jebisay Jaamacada
Jobkey ay astaan u tahay horumarka Jaamacaddu ku talaabsatay mudada kooban ee
ay jirtay, wuxuuna hambalyo u diray ardayda qelin jebisay isagoo u mahad
celiyey maamulka Jaamacada ee ku soo dedaalay ardaydan.
Guddoomiyaha
aqalka sare ee Baarlamanka Somalia Cabdi Xaashi C/llaahi ayaa isna hambalyada
ka sokow ardayda qelin jebisay ugu baaqay in aqoonta ay Mudada dheer soo
baranayeen wax ugu qabtaan dalkooda iyo dadkooda.
Ku-simaha
Raisul Wasaaraha ahna Raisul Wasaare ku-xigeenka Xukuumada Somalia Mahdi
Maxamed Guled (Khadar) oo ugu dambeyn ka hadlay munaasabada ayaa bogaadin iyo
hambalyo u diray ardayda qelin jebisay oo uu sheegay in looga fadhiyo ka qeyb
qaadashada dib u dhiska dalkooda.
“Wadanka
kasta horumarkiisa waxaa horseed u ah dedaalka ay muujiyaan aqoonyahanadiisa, wadamada
horumaraya ee aad arkeysaan aqoon iyo cilmi baaris ayey ku gaareen, waxaana la
idinka fadhiyaa inaad sidaas la mid dadkiina iyo dalkiina u horseedaan,
Soomaaliya oo hadda burburka ka soo kabaneysana idinka iyo kuwa idinla
mid ah ayey u baahan tahay” ayuu yiri raisul wasaare ku-xigeenka oo
balan-qaaday in xukuumadu ku dedaali doonto sidii shaqooyin loogu abuuri lahaa
ardayda qelin jebisay.
Hadallo
isugu jiray hambalyo, guubaabo iyo dardaaran ayaa waxaa intii munaasabadan ay
socotay ka jeediyey Masuuliyiin ay ka mid ahaayeen Wasiir ku-xigeenada
Wasaaradaha Waxbarashada iyo dastuurka ee dowlada Somalia, Senator Prof.
Cismaan Maxamuud Dufle oo ka tirsan xubnaha aqalka sare iyo masuuliyiin kale,
waxaana munaasabadaas goob joog ka ahaa Wasiirka warfaafinta Somalia Ing.
C/raxmaan Yariisow, xildhibaano, aqoonyano iyo marti sharaf kale oo fara badan.
Madaxdii munaasabadan goob jooga ka ahaa ayaa waxay shahaadooyin
gudoonsiiyeen ardaydii ka qelin jebisay kuliyadaha Jaamacadda Jobkey
waxaana xafladaas ay ku soo dhamaatay jawi farxadeed.
C/raxmaan Diini, Hiiraan
Online
[email protected]
