Khamiis, September, 21, 2017
(HOL) - Ciidamada dowladda Soomaaliya
iyo kuwa howlgalka midowgga Africa AMISOM ayaa siweyn u adkeynaya amniga guud
ahaan magaalada Beledweyne oo saacadaha soo socda la filayo in uu gaaro madaxweynaha
cusub ee maamulka Hirshabeelle Maxamed Cabdi Waare.
Waddada isku xirta garoonka diyaaradaha Ugaas
Khaliif iyo magaalada ayaa lagu arkayaa ciidamo ku hubeysan gadiidka dagaalka
oo gaaf-wareegaya si looga foojignaado falal amniga lid ku ah.
Maamulka gobolka Hiiraan ayaa ugu baaqay
bulshada in ku dhaqan magaalada in ay ka qeyb qaataan soo dhaweynta
madaxweynaha lana ilaaliyo xasiloonida.
Madaxweyne Maxamed Cabdi Waare oo xilkan loo
doortay 16kii bishan Sabtidii aynu soo dhaafnay ayaa ayaa wareegtadisii ugu
horeeysay ee uu soo saaray waxaa uu xilkii uga qaaday guddoomiyihii maamulka
gobolka Cumar Aadan Ibraahim Baadiyoow, waxaana mar kale xilka guddoomiyaha
gobolka loo magacaabay Cali Jeyta Cismaan.
Safarka madaxweynaha Hirshabeelle ee
magaalada Beledweyne ayaa lagu micneeyay sidii uu odayaasha iyo waxgaradka
gobolka uga raaridi lahaa in ay taageeraan maamulka uu madaxweynaha ka yahay oo
muddo dheerba laga diidanaa gobolka.
C/raxmaan Diini, Hiiraan Online
[email protected]
