Khamiis, September,21, 2017
(HOL)- Labadda xisbi
mucaarad ee WADDANI iyo UCID ayaa iskaga baxay shir u socday saxaafadda iyo
guddida doorashooyinka oo lagaga hadlayey sidii loo samayn lahaa guddida
ilaalinta anshaxa iyo dabagalka wararka doorashooyinka, taas oo haddii war
khaldan la tabiyo halis galin karta qaranka oo dhan.
Sidoo
kale, waxay dalbadeen in madaxweynuhu soo saaro saddex wareegto oo la xidhiidha
arrimaha doorashooyinka, haddii kale aanay saxeexi doonin heshiishyadda anshaxa
ololaha iyo guddida ilaalinta anshaxa saxaafadda.
Kulankan
oo xisbiyadda, guddida doorashooyinka iyo warbaahintuba ka doodayeen sida loo
xulayo gudidaasi warbaahinta ayaa waxa ka soo baxay labadda xisbi mucaarad oo
diiday laba xubnood oo wasaaradda warfaafinta ka socday oo guddidan lagu
darayey.
Xoghayaha
golaha dhexe ee xisbiga UCID Maxamuud Cali Jiir oo arrintaasi ka hadlaya waxa
uu yidhi “Xeerka saxaafadda waanu ka soo baxnay, waxa maamusha xukuumaddii oo
wasiirka warfaafinta ayaa maamusha, marka laba xubnood uu keensaday, labaddii
xisbi ee kalena ku yeelan waayeen waxa loo jeeda in aanay doorashadaasi noqon
mid cadaan ah, waxa nagu maqaalo ah oo aan ognahay in dhawr guri oo waaweyn
lagu ururiyo shaqaalihii dawladda oo la doonayo in loo kala diro hawlo khuseeya
doorashadda”
Waxaanu
intaas ku daray” waxaanu leenahay madaxweynaha sadexdii wareegto ee ku lamaana
xeerka anshaxa ee doorashadda illaa laga
soo saxeexo madaxweynaha xeerka ansaxa ma saxeexayno, haddii aanu nahay labadda
xisbi mucaarad, wareegtada looga baahan yahay inuu madaxweynuhu saxeexo waa
wareegta ciidamada qaranka in maalinta doorashada ka amar qaataan guddida
doorashooyinka, wareegtadda labaad waa ta shaqaalaha in aanay shaqo ku yeelan
hawlaha ololaha iyo doorashooyinka, iyo wareegtadda sadaxaad oo ah hantidda
dawladda, saddexdaasi wareegto ilaa uu madaxweynuhu soo saxeexo ma saxeexayno”
Xoghayaha
guud ee xisbiga WADANI Maxamed uur Cadde oo isna halkaasi ka hadlay ayaa yidhi
“ waxa la yidhi waxa la samaynayaa guddi ilaalisa si aanay saxaafaddu warar
khaladaad ah u galin wakhtiga doorashadda, waxay yidhaahdeen wasiirka
warfaafinta ayaa laba xubnood ku daraya, xisbiyadda kale kuma jiraan, marka
waxaan Guddida doorashooyinka leeyahay laba qodob waan ogolnahay in laga saaro
labadda xubnood ee dawladdu wadato, oo xisbiyaddu dibada ka joogaan, taas waan
ogolnahay, waxa kale oo ogol nahay in labadaasi loo ogolaaday xukuumadda aan anaguna
laba laba xubnood ku yeelano guddidan, wax intaas ka duwan oo aanu yeelaynaa ma
jirto”
Barkhad-ladiif M. Cumar,
Hiiraan Online
[email protected]
Hargeysa, Somaliland.