Galmudug oo taageertay mowqifka isbaheysiga Sacuudiga iyo Imaaraadka ee ka dhanka ah Qatar
Khamiis, September, 21, 2017 (HOL) - Maamulka Galmudug ayaa taageeray go’aanka xulufada Sacuudiga iyo Imaaraadka
Carabta ee ka dhanka ah dowladda Qatar, iyaga oo ka soo horjeestay go'aanka xukuumada Soomaaliya ay arintan ka qaadatay.
War qoraal ah oo ka soo baxay xafiiska Madaxweynaha mamulka Galmudug Axmed
Ducaalle Geelle (Xaaf) oo warkan lagu cadeeyay ayaa sidoo kale waxaa lagu
sheegay sababta Galmudug ay u taageertay Sacuudiga iyo Imaaraadka Carabta in ay
tahay xiriir wanaagsan oo kala dhexeeya.
Wasiirka Warfaafinta maamulka Galmudug Maxamuud Aadan Cusmaan ayaa
sheegay Shirkii Madasha Hoggaanka Qaranka ee lagu qabtay Muqdisho ay ku
wargeliyeen in xukuumadda Soomaaliya aanay mowqif dhex dhexaad ah ka qaadan
karin arrimaha Khaliijka, sababo ku aadan xiriirka taariikhiga ah ee kala dhaxeeya Sacuudiga iyo Imaaraadka Carabta.
Wasiirka ayaa dowladda Soomaaliya inay ugu
baaqay in ay dib u eegto mowqifkeedii dhex dhexaadka ee ay ka qaadatay
xiisada Khaliijka, islamarkaana ay tixgeliso walaaca ay qabaan dowlad
goboleedkada.
Maamul goboleedyada Hirshabeelle, Puntland, Koonfur Galbeed ayaa horey u
taageeray xulufada Sacuudiga iyo Imaaraadka Carabta, waxaana maamulka Galmudug
uu noqonayaa maamulkii Afaraad, ee taageera go’aana xulufada Sacuudiga ay ka
qaateen dowladda Qatar.
C/raxmaan Diini, Hiiraan Online
[email protected]