Talaado, September 19, 2017 (HOL) – Shantii maalmood ee u
dambeeyey waxa Somaliland laga
dareemayey hoos u dhac uu samayanyey dollarka, taas oo loo sababeynayo
maqnaashaha jaadkii lacagta badan ku bixi jiray ee wadanka Itoobiya u gudbi
jiray.
Gudoomiyaha sarifleyaasha
Somaliland Axmed Xasan Awliyo ayaa sheegay in hoos u dhaca ku yimid doolarkii
ay sababteeda leedahay lacagtii adkayd ee Itoobiya loo gayn jiray oo hadda
suuqii ku hadhay taas oo sababtay qiimaha dollar jabka oo u muuqda in uu hoos u
sii socdo.
Axmed Xassan Awliyo oo ka hadlaya
sababta keentay hoos u dhaca dollar waxa uu yidhi “Intii uu Jaadku socday kor u
kac ayaa ku socday dollar hoos u dhacna waxay ku ahayd qiimihii lacagta Somaliland,
boqolka doolar maalinba waxba ku
siyaadayey, shantii cisho ee jaadku inaga joogsaday kor u kiciina wuu joojiyey
hoos u dhacna wuu bilaabay, marka ninka jaadka ka ganacsadda kaash badan ayuu
soo xarayn jiray waxa uu raadin jiray Doolar oo lacag adag ayuu Itoobiya u
dirayey, laakin imika jaadkii wadaniga ahaa ayaa la cunaa”
Waxaanu intaas ku daray “baahidii
lacagtii doolarka ahaa ee uu jaadluhu doonayey meeshay ka baxday,waxa meesha ka
baxday kaashkii faraha badnaa ee jaadka la siin jiray iyo doolarkii habeenkii
la raadin jiray ayaa meesha ka baxday oo imika doolar lama raadiyo doolar
yaalana waxa kala qaata ganacsatadda Berbera uun baa dolarka sarifata”.
Sida sarifleyaashu sheegayaan
maalinka hor maalintii jaadku joogsaday waxa uu sarifku marayey milyan iyo
labaatan kun oo Shiling Somaliland, shalay galinkii hore boqolka dollar wuxuu
marayey sagaal boqol iyo sagaashan, halka xalay hoos usii dhacay oo uu marayey
sagaal boqol iyo sideetan kun oo shilling Somaliland.
Shantaasi cisho ee uu jaadku dalka
ka maqnaa waxa uu dooollarkii hoos u dhacay afartan kun ShSL, waxaana laga
yaabaa inuu hoos usii socdo mudadda uu dalka ka maqan yahay.
Dadka arrimahan u dhuun daloolaha
waxay sheegayaan tan iyo intii Itoobiya lacag adag ka dhigtay lacagta Jaadka ka
soo gasha waxa dhaqaalihii Somaliland ku yimid wareer iyo hoos u dhac ku yimid
Shiling-kii Somaliland, maadaama lacag badan oo doolar ah u baahdeen
ganacsataddii Jaadka si ay Itoobiya jaad kale uga soo iibsadaan, taasina waxay
dalkeena ku keentay sarif barar iyo in la kala waayo dollarkii.
Jaadkan laga joojiyey Somaliland
waxay fursad u tahay shacabka Somaliland iyo xukuumadiisa si mar labaad hadii
jaadka la furayo loo kala qorto heshiish,isla markaana aanay Somaliland ogolaan
wax dhaqaalaha Somaliland burburinaya oo lacagtii ay Itoobiya u gaynayeen
sababin in dhaqaalaha Somaliland hoos u dhicin.
Dhinaca kale, xukuumadda
Somaliland ayaa dhaqaale badan oo ay ka heli jirtay cashuurta Jaadka ku
wayday,taas oo kastamaddii Wajaale iyo Kala baydh oo inta badan lagu cashuuri
jiray Jaadka aanay shaqaynayn.
Sidoo kale, magaalo xuduudeedda
Tog-wajaale oo ahayd suuqa ugu weyn ee Oromaddu wax ka iibsato ayaa waxa iyana
la soo daristay dhaqaale xumo, iyadoo shantaasi cishe ee dhibaatooyinku dhaceen
aanay jirin cid wax ka iibsatay, kuwaas oo bakhaaraddii Oromadu wax ka iibsan
jiray iska xidhan yihiin.
Barkhad-ladiif M. Cumar, Hiiraan
Online
[email protected]
Hargeysa, Somaliland