Haweenay Reer Jabuuti ah oo Gaadhigii ay la socotay Oromo gadoodsan kala degeen Sawirro
Isniin, September,18, 2017 (HOL)-
Haweenay reer Jabuuti ah ayaa sheegtay in lagala degay gaadhi ay la socotay
wakhti ay maraysay deegaanka Oromadda, taas oo soomaalinimo darteed
dhibaatooyin wejigeedda ka muuqda loo gaystay.
Caasha Ciise waxay ka mid ah dad
safar ahaa oo la socday gaadiid, kuwaas oo Soomaalinimo darteed loogala degay
gaadhigii ay la socotay, inkastoo ay
sheegtay inay reer Jabuuti tahay hadana looma joojin ee baabuurkii ayaa lagala dagay kadib waxa
badbaadiyey ciidamadda Fadaraalka Itoobiya, kuwaas oo usoo gudbiyey magaaladda
Jigjiga ee dawlad deegaanka Soomaalidda Itoobiya.
Caasha Ciise oo ka hadlaysa sida
loola degay gaadhiga iyo dhibaatadda ay kala kulantay qoomiyadda Oormadda waxay tidhi “waxaan ka imid Jabuuti gaar
ahaan xaafadda Balbala, waxaan imid
Itoobiya oo aan ku socday Herer oo arrimo
caafimaad u tagay markii aan ka imid oo iska soo daweeyey ayaan soo maray
Haramaayo laakiin nasiib daro waxa la
igala tagay baabuurkii aan la soday, waxaan u sheegay in aan reer Jabuuti ahay
oo Paasaboorku ii fiisaysan yahay, layma dhagaysan, waxaanay igu yidhaahdeen ma
ciidanka Soomaaliya ka tirsan tahay, ka dibna ciidankii Booliska ee Oromadda
iyo shacabkoogii ayaa igu degay oo qof waliba wuxuu igu dhufan karayey wuu igu
dhuftay, waxaanay ila dhaceen qof waliba waxa uu heli karayey, anigoon waxba
kala garanayn oo koomo jiray waxaan is arkay uun anigoo Jig jiga joogo, markii
aan idhi yaa I keenayna waxa la ii sheegay in ciidanka Itoobiya ee fadaraalku
isoo badbaadiyeen, kaliya waxa la ii dilay uun soomaali baad tahay, marka dad reer Jabuuti ah way laayeen, dad
reer Somaliland ah way laayeen waxba umay aabo yeeleen oo SOomaali markay
arkaan way dilayaan, wixii aan sitay oo dhan way qaateen hadiii ay Pasboor
tahay, haday dharkii tahay iyo haday dhegihii aan xidhnaa tahay way iga
furteen.”
Sidoo kale, waxa iyaguna
warbaahinta la hadlay dad kale oo reer Jabuuti ah oo iyaguna sheegay in
gaadiidka lagala degay, qaarkood markii ay galeen saldhig ciidan in dib loogu
soo celiyey dadkii dilayey, taas oo ay soo badbaadiyeen Ciidamada Fadaraalka
Itoobiya.
Dhinaca kale, dawladda Fadaraalka
Itoobiya ayaa wadda hawlgalo lagu nabadeynayo deegaanada, waxaana si toos ah la
isku soo hor fadhiisiyey labada madaxweyne ee labadda kilil Oromo iyo
Soomaaliya, kuwaas oo Addis Ababa ku kulmaya, hasse ahaatee hore ayaa sidan oo kale la
iskugu keenay oo lagu heshiisiiyey, balse hadana heshiishkaaasi muu hirgalin.
Barkhad-ladiif M. Cumar,
Hiiraan Online
[email protected]
Hargeysa, Somaliland.