Dagaal culus oo magaalada Muqdisho ku dhaxmaray ciidamo ka wada tirsan dowladda
Sabti, September, 16, 2017 (HOL) - Dagaal
culus oo u dhaxeeya ciidamo ka wada tirsan dowladda
federaalka Soomaaliya ayaa Aroornimadii hore ee saakay ka dhacay weybo ka mid
ah degmooyinka Deyniile iyo Hodan ee gobolka Banaadir gaar ahaan agagaarka Haanta-dheer
xeradii ciidamada 77 illaa difaaca cirka.
Dad goob joogayaal ah ayaa warbaahinta gudaha u sheegay in dagaalkan ay
qaadeen ciidamada xasilinta caasimada, iyaga oo weeraray goob ay ku sugnaayeen
ciidamada ku labisnaa dareyska militariga.
G/dhexe C/llaahi Faarax Siyaad oo ka mid ah saraakiisha ciidamada xoogga
dalka ayaa sheegay subaxnimadii hore ee saakay weerar lagu soo qaaday
islamarkaana aysan ogeyn ujeedka lagu weeraray.
Dagaalka ayaa la sheegay in uu geystay dhimasho iyo dhaawac soo gaaray dadka
rayidka ah,balse ma jirto cid wali xaqiijisay tirada dhimashada iyo dhaawaca
intaba.
Ma’aha markii ugu horeysay oo sidan oo kale caasimada ugu dagaalamaan
ciidamada xasilinta iyo kuwa militariga Soomaaliya,
Wixii ka soo kordha waan idin soo gudbin doonnaa…
C/raxmaan Diini, Hiiraan Online
[email protected]
