Shirka gollaha wasiirada oo looga hadlay qodobo ay ka mid tahay doorashada 2020ka
Khamiis, September, 14, 2017 (HOL) - Shirka Khamiislaha ee todobaadkiiba mar ay
yeesheen xubnaha gollaha wasiirada xukuumada Soomaaliya uuna shir guddoomiyay
ra’iisal wasaare Xassan Cali Kheyre ayaa looga wada hadlay arimo dhowr ah oo ay
ka mid tahay doorashada la filayo in ay dalka ka dhacdo 2020ka.
Hay’adaha amniga ayaa ugu horreyntii laga dhageystay warbixinta amniga,
iyagoo sheegay in kooxaha ka soo horjeeda dowladda in ay gobollada qaar qaraxyo
ka geysteen oo shacab ay ku laayeen, iyadoo hay’adaha amniga ay sii laba jibaarayaan
soo celinta amniga iyo xasiloonida.
Wasaarada Gaashaandhiga ayaa sheegtay in ay socoto qiimeyn lagu sameynayo
diyaar garowga ciidamada xoogga dalka Soomaaliyeed ee ku aadan sidii ay amniga
dalka ula wareegi lahaayeen mustaqbalka dhaw.
Golaha wasiirada ayaa warbixin ka dhageystay guddiga madaxa-bannaan ee doorashooyinka
oo soo bandhigay qorshaha guud ee doorashooyinka, si qoto dheerna uga
warbixiyey horumarka ay ku tallaabsadeen ee ku aadan u diyaar garowgooda,
sheegeyna in ay ka go’antahay sidii dalka looga hirgelin lahaa doorashooyin hal
cod iyo hal qof ah.
Guddiga ayaa sheegay inay daraasad ku sameeyeen dalal badan oo duruufaha
heysta ay la mid yihiin Soomaaliya haddana ay doorashooyin ka qabsoomeen.
Guddiga ayaa sheegay in ay jiraan caqabado fara badan, kana codsaday in golaha
wasiirada ay xal u helaan caqabadahaas oo ay ka mid yihiin tan dhaqaalaha,
amniga iyo siyaasada oo muhiim u ah qabsoomida doorashooyinka. golaha wasiirada
ayaa guddiga ku ammaanay dadaalkooda una ballanqaaday inay u fududeyn doonaan
howlahooda si dalka looga hirgeliyo doorashooyin hal qof iyo hal cod ah 2020ka.
Golaha wasiirada ayaa dood dheer iyo falanqeyn ka dib si aqlabiyad leh ku
ansaxiyey Hindise Sharciyeedka xaqsiinta ciidamada qalabka Sida, oo muhiim u ah
dib-u-habeynta ciidamada Qaranka iyo sidii dadka howlgabka ah, agoonta iyo
curyaamiinta ay u heli lahaayeen xaquuqdooda aasaasiga ah. Sharcigan ayaa ahaa
mid dib u eegis ku sameeyey Sharci Lr 6 ee 31kii December 1969kii, si loola
saanqaado xaalada dalka ku suganyahay.
Gollaha wasiirada ayaa ugu danbeyntii ka dooday hindise sharciyeedyo kale si
looga soo baaraandago oo kulamada danbe loo ansixiyo.
Sidoo kale golaha wasiirada ayaa dib u eegis ku sameeyey xeer hoosaadka golaha
wasiirada, kuna ballamay inay ka soo baaraandegaan si loo ansixiyo kulamada
danbe.
C/raxmaan Diini, Hiiraan Online
[email protected]
