Tartanka cayaaraha Kubadda Cagta maamul gobolleedyada oo laga soo wareejiyay Kismaayo
Khamiis, November, 30, 2017 (HOL) –Kaddib kulan hal maalin qaatay oo
magaalada Muqdisho ku dhaxmaray wasaarada cayaaraha dowladda federaalka iyo
maamul gobolleedyada ayaa leysku afgartay in tartanka kubadda Cagta maamul
gobolleedyada loo soo wareejiyo magaalada Muqdisho, halka markii hore qorshuhu
ahaa in uu ka furmo magaalada Kismaayo.
Kulanka ka dhacay xalay magaalada
Muqdisho loogana dooday qabashada tartankan kaddib markii la ogaaday in wali
uusan diyaar ahayn garoonka magaalada Kismaayo ee hore loo qorsheeyay in uu ka
dhaco tartankan.
Kulankan oo ay ka qeybgaleen wasiiro ka socda maamul goboleedyada iyo
maamulka gobolka Banaadir ayaa loogaga dooday sidoo kale xilliga uu dhacayo
tartanka waxaana la isku raacay inaan wax laga bedelin jadwalka tartanka
iyaaraha maamul goboleedyada dalka oo ku beegan 7da bisha December 2017.
Tartanka Ciyaaraha Maamul Goboleedyada dalka oo sanadkan diyaar garow badan
laga sameeyay ayaa waxaa ka qeyb galaya Maamulada Puntland, Galmudug, Jubbaland,
Koonfur Galbeed, Hirshabeelle iyo Gobolka Banaadir.
Bishii July ee sanadkii 2016-kii Tartankii Ciyaaraha Dowlad Goboleedyada ee
lagu qabtay Muqdisho ayaa waxaa ku guuleystay Maamulka Puntland, halka
Jubbaland ay kaalinta labaad soo tiigsatay.
C/raxmaan Diini, Hiiraan Online
[email protected]
