Munaasabad sagootin ah oo xarunta Dowladda Hoose ee Xamar loogu sameeyay guddoomiyaha baarlamaanka Jabuuti
Talaado, November, 28, 2017 (HOL) – Munaasabad sagootin ah ayaa loogu qabtay Aqalka dowladd hoose ee
Xamar guddoomiyaha baarlamaanka Jabuuti iyo wafdi uu horkacayo oo maalmihii ugu
danbeeyayba ku sugnaa magaalada Muqdisho.
Munaasabada oo uu soo qabanqaabiyay maamulka gobolka Banaaadir, waxaana ka
qeyb-galay ku-simaha madaxweynaha Soomaaliya ahna guddoomiyaha golaha shacabka
Maxamed Sheekh Cusmaan Jawaari, Guddoomiye ku xigeenka koowaad ee golaha
shacabka, Wasiiro, Xubnaha labada golle ee Baarlamaanka Soomaaliya,
Masuuliyiinta sare ee gobolka Banaadir iyo marti sharaf kale.
Guddoomiyaha gobolka Banaadir ahna duqa Muqdisho Taabit Cabdi Maxamed ayaa
Guddoomiye Xumud iyo wafdigiisa mar kale ku soo dhaweeyay Caasimada Soomaaliya
ee Muqdisho.
Wasiirka Wasaarada Dhalinyarada iyo Cayaaraha ee Xukuumada Soomaaliya
Xildhibaan Khadiijo Maxamed Diiriye ayaa ka sheekeysay kaalinta dowladda
Jabuuti ay ku lahayd dhismaha dowladnimada Soomaaliya.
Guddoomiyaha Baarlamaanka dalka Jabuuti Maxamed Cali Xumud oo munaasabada ka
hadlay ayaa u mahad celiyay maamulka gobolka Banaadir, isaga oo sidoo kale
sheegay in shacabka labada magaalo ee Jabuuti iyo Muqdisho ay yihiin dad
walaalo ah.
Prof Jawaari oo ka hadlay munaasabada ayaa dhiniciisa ugu baaqay dhalinyarada Soomaaliyeed in ay ka
shaqeeyaan siddii uu dalku u noqon lahaa mid xasiloon.
Sidoo kale dhalinyarada waxa uu ugu baaqay in ay u diyaar garoobaan sidii
talada dalka guud ahaan ay ula wareegi lahaayeen oo ay u muujin lahaayeen
kaalintooda.
Mustaf Hussien
[email protected]
