Isniin, November, 27 (HOL) – Ururka Al
Shabaab ayaa sheegtay in ay qabteen diyaarad nooca Drones -ka ah oo ay sheegeen
in ay ku soo dhacday Buuraha Galgala ee Gobolka Bari.
Warbaahinta Al-shabaab ayaa la sheegay in diyaaradan ku soo dhacday Buuraha
Caalmadow ee Gobolka Bari durbadiiba halkaasi ay ka qaadeen xoogag ka tirsan
Ururka Al Shabaab.
Drones ayaa la sheegay in ay ku xirnaayeen Kaamirooyin wax basaasa , waxaana
la sheegay in hadda ay gacanta ku hayaan dagaalyahanno ka tirsan Al-shabaab.
Diyaaradaha Drones-ka ee wax duuba ayaa dul wareega Saldhigyada Al-shabaab ay
ku leeyihiin Gobolada dalka Soomaaliya, iyadoo Al-shabaab ay horay u qabteen
diyaarado sidan oo kale ugu soo dhacay deeganada ay ku sugan yihiin.
Ciidamada Puntland ayaa maalmahan dambe waxaa ay dhaqdhaqaaq ciidan ka
wadeen Buuraha Caalmadow ee Gobolka Bari, halkaasi oo ay ka raadinayeen xubno
Shabaab ka tirsan.
Diyaaradan ku soo dhacday Gobolka Bari, ayaa noqonaysa tii ugu horeysay ee
nooceeda Drone ah oo Shabaabka ku sugan Buuraha Galgala ay qabtaan.
C/raxmaan Diini, Hiiraan Online
[email protected]
